Letare al President de Republiche

Ai 17 di Març passât il Comitât pe autonomie e il rilanç dal Friûl al à mandât al President de Republiche, Zorç Napolitano, une letare li che i à domandât un incuintri par presentâi la cuistion furlane e provocâ une sô valutazion politiche.
In primis, te letare, al ven ricuardât ce che al à dit Pier Pauli Pasolini “il Friûl al è Italie”, cuant che, ancjemò tal 1945 il poete – che al faseve part dal Comitât pe autonomie furlane di chê volte – si rebecave cun cui che al dineave la domande di autonomie come che si volès stacâ il Friûl de Italie. Ancje cumò, al è scrit te letare dal Comitât, di front de simpri valevule domande di identitât, di autonomie e di autoguvier de Patrie – par dineâle – si son jevadis vôs achì, su sfueis talians e adiriture tal Parlament de Republiche, che a acusin i furlans di jessi nazionaliscj, di volê fintremai meti in pîts un Stât tal Stât, di volê valorizâ la lenghe furlane, chê slovene e chê todescje in cuintrialtâr al talian o al inglês. Dut chest – nus incolpin – par sierâ il Friûl in se stes, lant cuintri cussì ae unitât de Republiche e al procès di coesion europeane e di globalizazion.
Tal incuintri che o spesseìn a domandâ – al à scrit il Comitât al President Napolitano – o volaressin pandi i fuarts sintiments che a lein i furlans ai principis democratics e costituzionâi, che a àn a testimoni il grant apuart dal nestri popul e des sôs formazions partigjanis “Garibaldi – Friuli “ e “Osoppo – Friuli” pe liberazion dai “nestris fogolârs” e de Italie e par che e tornàs la democrazie. Di chi la spiete de nestre int di un plen ricognossiment dai siei sacrosants dirits identitaris e linguistics, previodûts dal art. 6 de Cjarte costituzionâl, de leç statâl n. 482 dal Dicembar dal 1999, des Convenzions europeanis firmadis ancje dai Guviers talians.
La letare dal Comitât si siere disint che i furlans a spietin dal President de Republiche un autorevul segnâl politic che al fasi capî a ducj che, te Italie republicane e democratiche e te Union europeane, a àn di jessi consideradis aes nestris spalis, tesis centralistichis e nazionalistichis dal vieri Stât talian fassist e monarchic. Par promovi unitât e coesion te interie societât taliane di vuê, al covente svilup de democrazie, rispiet e atuazion dai dirits costituzionâi, plurilinguisim, decentrament dai podês sedi de bande dal Stât che de Regjon.
Cuant che l’incuintri cul President de Republiche si tignarà – o in Friûl o a Rome – al è di sperâ ben che la delegazion furlane e sedi rapresentative ad implen e al plui adalt nivel de realtât istituzionâl, religjose, culturâl e economiche dal Friûl. Curtis e che si tocjin, duncje. Al sarà cussì che i contraris ai dirits dai furlans e dal Friûl – sedi di Rome, che di Triest, e, in cualchi câs, ancje di chi – a varan une biele e fuarte rispueste e che la nestre bataie e varà plui prospetivis di jessi puartade indenant viers gnûfs e positîfs risultâts. A partî de difese de leç regjonâl pal furlan, dal nestri obietîf di autoguvier, di unitât e di svilup dal Friûl che o puartarin a cjase cu la plene operativitât de Comunitât des Provinciis furlanis e, par ultin, cul furlan a plen dirit in Rai tai notiziâris e tai programs culturâi pal Friûl.