Ai 29 di Avrîl. 19 Comuns de regjon aes urnis

Si votarà ancje pe costituzion di doi Comuns gnûfs
Domenie ai 29 di Avrîl cu la elezion dal president de Regjon e dal XII Consei regjonâl a saran rinovâts ancje i orghins di 19 comuns e si davuelzaran i referendums consultîfs pe costituzion, midiant di fusion, di doi gnûfs comuns. Si votarà des 7 di matine aes 11 di sere.
Par ce che al tocje lis elezions comunâls, si votarà in doi comuns, Udin e Sacîl, cun popolazion superiôr a 15 mil abitants, che la leç e previôt il davuelziment dal turni di balotazion intal câs là che, al prin turni, nissun dai candidâts ae cjarie di sindic al vedi rivât a vê la maiorance assolude dai vôts bogns.
A saran clamâts aes urnis cun di plui i citadins di Brugnere, Faedis, Flum Venit, Flumisel Vile Visintine – chest ultin risultât de fusion dal prin di Fevrâr stât -, Foian Redipulie, Forgjarie, Glemone, Martignà, Polcenic, S. Denêl, S. Zorç de Richinvelde, S. Zorç di Noiâr, Secuals, Spilimberc, Talmassons, Trep Liussûl – ancje chest ultin fondût al prin di Fevrâr passât – e Çopule.
I referendums consultîfs a rivuardaran i comuns di Aquilee e di Tierç pe costituzion dal comun clamât Aquilee, e i comuns di Raviei e di Vile pe costituzion di chel denominât Vile Raviei.
par cure de redazion