MEDITANTLIS TAL SO CÛR. Fîs de salvece universâl

A son tornâts ancje chest an i Sants Ermacure e Furtunât e nus invidin al apuntament e avôt te basiliche mari di Aquilee.
Une Messe li che a la memorie de cene di Crist si unìs la memorie
de storie dal nestri Friûl e il ricuart dai nestri amîs, benedets,
che a no son fra di nô.
Ancje chest an il grant mosaic dal paviment de basiliche nus clame
e cuasit za nus cjacare colm di elegance e di bielece, di vite
e di colôr. Za mi somee di contemplâ chel mâr, lis ondis, lis barcjis, la varietât dai pes e sore dut Gjone che al ven glotût di chel besteon che al fâs pôre.
In chescj ultims mês o ai vût dafâ in mût particolâr cun int provade tremendementri dal dolôr, angossiade di torments e spavents, stremade di disfurtunis cence fin. Int rivade a un pont tâl che bevi un cafè o butâsi jù dal balcon al è compagn. Int che no acete plui di patî, che e brame une fin, e cîr un tiermin, une liberazion. A son i Gjone di vuê, glotûts de disgracie, o de tristerie o di une societât artificiâl che dut sdrane. Int za colade tes inferis, tal infier.
O cjali: la besteate dal mosaic e à vût dûl di Gjone e lu à tornât a butâ fûr; di fat lu cjatìn beât e content sot la ombre dal ricin. Ancje pal profete al è stât un limit e ancje pal tribulât, pal inocent perseguitât, pal danât e scuen jessi une fin al patî. Ma se chest al è vêr, e cole une altre veretât: la eternitât dal infier.
O sai che cumò o stoi fasint un passaç des inferis, come lûc dai muarts, al infier come lûc dai maladets, ma tes inferis, par nô, al è comprendût ancje l’infier.
Nus contavin i predicjadôrs dal ‘seminari che il patî dal mont al è une cjiche paragonât al fûc di là vie di là e che la eternitât e sarà cussì: la anime danade e varà ancjemò di començâ a tribulâ cuant che e varà jemplât di lagrimis il spazi che al separe il cîl de tiere, savint che il voli al darà une lagrime sole ogni miliart di agns…
Ce int cence cjâf e cence cûr, cence religjon, che nus fasevin scoltâ!
No dinei il Catechisim de Glesie catoliche; mi domandi dome se mi tocje di plui un scheme di cjanui e di teologjiis o il berli cence fin dal disperât. Puedial Diu che al è amôr, condanâ pe eternitât? Puedial Crist, che al è vignût a cirî Adam intes inferis suturnis de tiere, bandonâ vuê la piore che si rustìs ciulant tal infier?
O cjali al mît di Gjone sul paviment di Aquilee: ancje alì o cjati Bibie, i paris de glesie, la sabide sante, un spieli e segnâl de misericordie infinide di Diu. Il Catechisim catolic mi somee masse sigûr, ridutîf, limitatîf dal misteri, risultât di posizions e polemichis che no dipendin dal dut de ricjece de peraule di Diu.
No dinei ma o domandi, o propon di riviodi e di tornâ a valutâ.
I doi reson a la int cuant che e dîs che nissun al è tornât di ca a spiegâ ce che al è là vie di là.
Nô o sin fîs di Alessandrie di Egjit, fradis di Gjone e de salvece universâl.
Ducj, dal Pape in jù, o crodìn di cristians che Crist inte sabide sante al è sprofondât tes inferis par lâ a salvâ ce che al jere pierdût; ma se Crist al à visitât cu la sô potence lis inferis… ancje lis inferis, e par nô dut l’infier, tocjâts di Crist, a son jentrâts cun lui tune inmense sperance: chê de salvece.
pre Tonin Cjapielâr