ATAUALITÂt – Gianni al puarte il furlan ae universitât

La Cort Costituzionâl e sfulmine cu lis sôs sentencis, e i furlaniscj a tonin.
I politics a fasin plovi, aghe par ca, aghe par là. La tutele de marilenghe, si sa, e je simpri jenfri la burascje. Ma come che si dîs, al è simpri chel che i pues colâ il mont intor che tant lui no si sposte. Chel che, tal mieç dal temporâl, al vierç la ombrene, al met sù i stivâi, e al va indenant pe sô strade.
Gianni Stelitano al à metût ancje l’impermeabil. Gianni al è di Codroip, al studie Siencis motoriis a Glemone, un cors de Universitât dal Friûl. Al fâs ducj i esams par furlan. Cuant che si è iscrit al à domandât al preside di facoltât, Pietro Enrico di Prampero, se al podeve sostignî lis provis te sô  lenghe. Di Prampero al à fevelât cul retôr di chê volte, Furio Honsell, e la rispueste e je stade: «Sigûr che tu puedis. Al è un to dirit».
Gianni Stelitano, contenton, al è restat distès un pôc stranît. No par vie che si spietàs une brute rispueste, ma parcè che al à viodût tai siei professôrs ancje un ciert entusiasim pe situazion.
Lui al è un student un poc dispatussât: al à 42 agns.
Cemût mai ti ise vignude cumò gole di laureâti?
Jo o lavori al 118 di tancj agns, o vuidi lis ambulancis. Il gno sium al jere chel di deventâ miedi ma dopo, par un motîf o par chel altri, al è saltât. E alore o ai voie di riscatâmi. Sigûr che par metimi a studiâ medisine cumò al è un pôc tart, e alore o ai sielt il cors di Siencis motoriis, che al fâs simpri part de facoltât di Medisine.
E cemût vadie?
Benon. Mi soi iscrit tal 2007: o soi al secont an. O ai fat ducj i esams, mi mancje un dal prin an ma mi met in rie subit.
Compliments. Ancje parcè che, si à di dîlu, in plui di lavorâ e di studià, tu âs ancje un altri impegn. Tu sês pari di dôs frutinis.
Dôs e mieze. Parcè che une altre e rive a Setembar.
Ma cuant cjatistu il timp par studià?
Si cjate, si cjate. Ancje se o ai di ringraziâ Nicoletta, la mê femine, che mi sosten e che mi da la oportunitât di rivâ a fâ dut. E ancje i mei coleghis, dal 118. Dispès o ai di seguî i cors par sostignî i esams e alore si metìn dacuardi cui turnis, cui oraris.
Prin di lâ indenant cu lis domandis, bisugne contâ cualchi altri particolâr su di lui. Chês robis che a vegnin fûr tra gjornalist e intervistât, cussì scuasit par câs. Gianni, te burascje, al à viert la ombrene, metût i stivâi, l’impermeabil. Ma lu à fat simpri, te sô vite. La sô prime fie, che e à di finî siet agns, le à clamade «Nêf», par furlan. Parcè che al à dit che la nêf lu à simpri inmagât, e je une robe vive, cjalde e frede, che e sta par aiar e par tiere. La seconde frute e à un non inglês, Irish, par vie de sô passion pe Irlande. E chê che e rivarà? Si torne sul furlan, forsit, ma Gianni al è un pôc in contrast cu la femine. Al è un altri non par furlan, origjinâl. Nô da la Patrie dal Friûl lu savìn ma nus à menaçât: «No dîlu nancje a vuestre agne!».
Trops esams âstu dât par furlan?
Ducj chei orâi, fûr che un fat cuntun professôr di Rome. «Nuoto», «Fondamenti di attività motorie», «Scherma», «Tecniche e metodi di allenamenti di sport di squadra» e «Rugby». No ai cjatât mai nissun ostacul. Se o pues, ju fâs par furlan: al è un gno dirit. Ma se o cjati un professôr che mi domande di fevelâ par talian, no ai problemis. Jo no ai voie di imponi la mê lenghe, o ai voie di doprâle, cuant che o pues.
E fevelâ par furlan cui docents isal stât naturâl?
Sì, sì. Ancje lôr mi fasevin lis domandis par furlan. A son stâts colocuis cetant normâi. Par esempli, il professôr Elio De Anna (assessôr regjonâl al sport), che al insegne rugby, mi à dit: «Jo o soi di là da la aghe, duncje o cjacari il gno. Tu il to, ma si capìn». E cussì e je stade.
E i scrits, invezit?
No, chei par talian.
E i tiei compagns di cors? Âstu fat gole a cualchidun di doprâ il furlan a scuele?
O ai un biel rapuart cun lôr. Al sarà par vie che o soi un che no si cjape tant sul seri: la diference di etât no si sint. Ma par cumò no ai cui che mi ven daûr. Cuant che si è zovins, si è leâts al «branc», si à pôre di sei judicâts mâl se si fâs une sielte cuintri corint. Jo o speri di puartâ un esempli, vâl a dî chel che par furlan si pues fa dut. No si scuen, ma no bisugne ve pôre di doprâlu, tes istituzions, tai media, te vite publiche, a scuele.
E la tesi?
Ancje chê par furlan, naturâl. Le scrivarai e le discutarai in marilenghe. E o soi content dôs voltis, par vie che tant che relatôr si è ufiert il preside, il professôr Pietro Enrico di Prampero. Al è un fisiolic di fame mondiâl e – soredut – furlan, di lenghe e di cûr.
VALENTINA PAGANI