«Zûc de ocje» pai fruts: ve la seconde edizion

Martars ai 7 di Novembar e je stade presentade le seconde edizion dal Zûc de ocje in furlan pai frutins, inte edizion 2017 di Puints, incuintris su lenghe identitât e autonomie, promovût dal Istitût Ladin Furlan Pre Checo Placerean insiemi ae Provincie di Udin, cul supuart de Regjon Friûl-Vignesie Julie. «Imparâ midiant dal zûc al favorìs l’aprendiment tai fruts»: e va daûr di chest pinsîr la iniziative che e à realizât il zûc di taule rivisitât in version marilenghe, tornât a fâ cui dissens di Otto D’Angelo e la supervision dai tescj a cure de ARLeF.
Lorenzo Zanon, president dal Istitût Ladin Furlan Pre Checo Placerean nus dîs: «L’obietîf al è chel di judâ l’aprendiment dal furlan tai plui piçui te scuelis e in cjase cui gjenitôrs. Jessint che a mancjin materiâi par furlan pes gnovis gjenerazions, si sin poiâts a chest strument che al pant la lenghe traviers il divertiment. I fruts a imparin a doprâle parcè che, lant indevant tes caselis, al è dut scrit par furlan e alore a àn par fuarce di scuvierzi “cemût che si dîs”. Si sin impegnâts par une seconde edizion parcè che te scuelis e je stade une domande grandone. Cussì o sperìn di lâ indenant su cheste linie».
La scjate si compon dal classic tabelon di 70×50 centimetris, cui segnepuescj, i dâts e lis caselis numeradis fin ae 63 che e segne il travuart. La ambientazion e riclame il Friûl rurâl: ogni tessare e à un dissen di un lûc o di une bestie, e il so non in lenghe furlane. Posizionâts ae partence, i fruts a àn di sfidâ i aversaris passant pal numar 8, «confenon», lâ indenant cul «masurin» al numar 16, il «pic» ae postazion 22, la «sghirate» al 40, il «scriç» al 43 e cussì indevant fin al obietîf finâl. «Petade a ducj. Tu sês rivât prin»: la fin dal zûc, la vitorie.
Mil copiis preparadis pe difusion ai insegnants de scuele primarie, cu la consegne gratuite di une par classe; e seguitarà une distribuzion ai istitûts scolastics. La prime edizion e je lade vie in curt e la seconde e je destinade a fâ le stesse fin, duncje par vê une copie la richieste e va fate ae ARLeF.
✒ Sara Palluello