Sfuei Mensîl Furlan Indipendent
Archivi de Patrie

COGNONS DAL FRIÛL

............


Midiant de storie dai cognons furlans, si fâs ancje la storie dal nestri Friûl. Une vore a son nassûts di stranons dâts aes personis e, po dopo, aes fameis. Chest mês us proponìn 6 cognons che a nassin di stranons che no sarès tante braùre di vêju. I letôrs che si clamin cussì, no se varan par mâl.
(Gjavâts fûr di I cognomi del Friuli di Enos Costantini e Giovanni Fantini ed. La Bassa/LithoStampa. O ringraciìn i autôrs pe disponibilitât e pe colaborazion).
CLAPIS/CLAPIZ
Al podarès vignî dal non sloven Hlap o dal apelatîf sloven hlapec (che al stâ par “garzon/sotan”), ma ancje dal furlan “clape” (nadie).
Te forme Clapis si cjatilu a Monfalcon. Te forme Clapiz a Vençon, Tumieç, Vile di Cjargne, Cividât.
Tal 1321 Martino d.° Clapiz abit. Tarcento; 1395 Gio Clapiceo (o Clapiz) era giurato di S. Maria La Longa; 1819 Michele Clapis di Gio Batta d’anni 34 murero di Muzzana, sposa Sabbata Peressuti o Perazzo figlia di Vitale Dondo d’anni 36 da Muzzana.
CUDICIO
Al va colegât di sigûr al sloven hudic (cudicj/diaul). Cognon tipic di Torean. Si cjatilu ancje a Cividât, Udin e Sant Zuan.
Tal 1463 Liment Cudiç e Stiefin Cudiç a Rascjà in comun di Faedis. 1650 don Nicolò Cudiz di Siacco in lite per due botti di vino con Giovanni q. Giovanni Cudiz di Siacco.
MUSURUANA
Si pense che al vegni di “muse ruane”, un colôr che par solit a àn chei che a bevin masse. Presint a Tor di Zuin, ‘Sevean di Bagnarie, Dael, Palme, Udin. 1770 M° Micaelle Musuruana , priore Fraterna SS.mo Sacramento di S.ta Maria la Longa; 1809 Gio.Batta Musuruana possiede due bovi e una vacca in Palmada.
STRUSSIAT
Al vûl dî “fruiât/scanât di fadie”, duncje il sorenon di un che al lavorave di un scûr a di chel altri. Presint a Flumisel. 1809 Giovanni Strussiat colono in Fiumicello.
BARBOT
Cognon che al ven fûr di un stranon che nol covente stâ a motivâ, dal tipic difiet tal tabaiâ.
Ben presint a Davian, si cjatilu ancje a Udin.
1541 Antonio Barbot da S. Daniele – lapicida – teste in Cividale; 1558 Bastian Barbott et Consorti de Arzine fitt. Sigg. Prodolone.
BATTOCLETTI
Si pense che al sedi il diminutîf (batoglet) de peraule batali “imprest par bati il forment”, deventât dopo sinonim di “stupidel/basoâl”. Cul stes significât si cjate ancje “batocjo”.
Cognon tipic di Cividât.

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +