Un par di bilietuts pe gnove Zonte Regjonâl

O cjati une vore intrigôs rivâ a cisicâ alc di util pal Friûl, e par dute la Regjon F-VG, tes orelis dal President e dai Assessôrs de gnove Zonte Regionâl. Si trate di int sperimentade e preparade, che cun reson e pense di savêle plui lungje di me.
Ma distès o tenti di butâ li un pâr di bilietuts, con dôs ideis cence pretesis, te sperance che a rivin tes mans justis.
Prin bilietut, in fat di industrie
Lis industriis furlanis, nassudis sui cincuante agns indaûr e inmò vivis vuê, lis àn metudis sù in grande part artigjans cul voli lunc, int che e lavorave cu lis sôs mans, ma e jere ancje in stât di trasferî il so savê fâ in scjale plui grande. Par un pôcs di agns chestis fabrichis si son svilupadis perfezionant lis machinis e ideant prodots in linie cul progredî de societât, po a àn adotade la eletroniche, orepresint a zontin creativitât a produzions simpri plui personalizadis.
Chestis industriis, impegnadis une vore te manifature, no son insom dal troi, a pat di judâlis a evolvi viers formulis di business di ponte, come che si use dî. Cemût? Prime di dut, metint a puartade la ricercje. Nol è un risultât facil di otignî, parcè che par rivâi bisugne meti in parilie l’ambient universitari e chel di fabriche, dôs mentalitâts un grum lontanis.
Cui parcs tecnologjics di Udin, Pordenon e Gurize, cul impegn de Universitât dal Friûl e cu la leç Bertossi si à tacât a fâ alc di seri (e ancje a vendilu une vore ben); ma, par sei francs, vê tacât ben nol baste. Cualchi câs di sucès al è masse pôc. Vê une biele riusside che e fâsi efiet sul complès de industrie furlane al è dificil. Al covente lâ indenant cun vigôr, continuâ, judant a adatâsi ai gnûfs svilups dal sisteme industriâl mondiâl lis nestris aziendis.
Ricercje e introduzion di inovazions tecnichis e organizativis a àn di sei il pan di ogni dì di ducj i industriâi. Creâ un clime favorevul in cheste direzion: ve un compit nobil e util dal gnûf Assessôr pe Industrie de Regjon. L’obietîf al è clâr: al vinç chel che al è un pas plui indenant di chei altris.
Infin, bisugne sei plui dongje a lis aziendis che a partissin par prodûsi alc doprant tecnologjiis di gnove scuvierte, i spin-off, come che si dîs vuê. Cun pôcs carantans si à simpri cumbinât pôc. La industrie gnove no pues nassi come chê dal dopo vuere, fasint stât sui sparagns dal artigjan. Ideis e tecnologjiis avenieristichis a vegnin tal cjâf dai zovins studiâts e no, cun pocje pecunie in sachete, che tal partî a àn bisugne di sei judâts cun gjenerositât (e cun severitât, si capìs).
Secont bilietut, in fat di culture furlane
Se la industrie e je la mê profession, la mê sielte di utilitât, la lenghe furlane e je il gno divertiment, amât e preziôs. Al prin puest o met une racomandazion avonde naturâl: chê di meti in pratiche cun inteligjence la leç sul insegnament de lenghe furlane a scuele. Al vignarà ancje il timp par miorâ la leç. Pal moment bisugne sperimentâle cun amôr. Une novitât culturâl cussì biele no si à di lassâle sapulî te fumate des polemichis.
Cuant che tun paîs si à di frontâ une iniziative serie, si metin insieme i grancj, no i fruts. Ve: la gnove leç sul furlan e je une robe par grancj, par int ponderade e madure, che no si lasse sviâ di capricis e cjacaris. Il gno auguri e il gno sburt a son che dut al vadi indenant cun sintiment.
Mi pâr di just però butâ fûr ancje une idee forsi origjinâl, ancje se mi darès di maravee che e podedi sei considerade tâl: dongje de traduzion de Bibie, dongje des publicazions dai autôrs furlans, e starès ben ta ogni biblioteche publiche e privade furlane une golaine di autôrs classics grêcs e latins, tradusûts par furlan, cul origjinâl di front. Bisugne sei coerents: fâi imparâ a lei e scrivi par furlan ai fruts e dopo no dâur di lei i libris li che si fonde la nestre culture – furlane e nazionâl – e je une decision strupiade. Fasìn lis robis par ben: no mancjin lis fuarcis e la spese no je masse grande. Jo o soi pront a fâ la mê part a gratis. Une corone di orâr sul cjâf di cui che al sarà bon di meti in at chest plan.