di Robert Louis Stevenson
(voltât di Marco Stolfo)

.

Cjapitul 1
Storie di une puarte

Utterson, l’avocat, al jere un om dal aspiet rusgnac che nol veve mai ridût inte sô vite. Al jere frêt, sec, imberdeât tal fevelâ, restîf a vê passions, smenglât, canocjon, sdavàs, suturni. Cundut achel al veve ancje alc di amabil. Tai incuintris cui amîs e cuant che il vin al jere di so agradiment, tai siei voi al barlumave alc che al jere pardabon uman. Al jere alc che nol rivave mai a saltâ fûr des sôs peraulis ma che si palesave tal cidinôr dal so mustic dopo gustât e ancjemò plui a clâr e dispès tes sôs azions di ducj i dîs.

Utterson al jere dûr e costumât cun se stes: cuant che al jere di bessôl al beveve gin cun chê di cjastiâ la sô passion pai vins di cualitât e cundut che i plaseve il teatri a jerin vincj agns che nol leve a viodi un spetacul. Però al jere une vore tolerant cun chei altris e fintremai si maraveave, cuasi cun invidie, denant di chê vitalitât che e implicave i lôr malfats. Tai câs plui pençs al veve miôr dâ une man pluitost che condanâ. «Jo o stoi de bande di Cain», al diseve in maniere estrose. E al zontave: «O lassi che ognidun al ledi al infier te maniere che i va miôr». Cuntun naturâl di cheste fate, si cjatave dispès a jessi la ultime cognossince onorevule e la estreme influence positive te vite di tancj di lôr che a jerin zaromai insom de degradazion. Fintant che a levin tal so studi, il so ategjament cun ducj lôr nol cambiave nancje di un et. Par sigûr chel compuartament nol jere dificil par Utterson, stant che al jere l’om plui risiervât dal mont e ancje la sô amistât e jere fondade su bontât e tolerance.

Al è tipic dal om sempliç dâ acet a chel zîr di amîs che i ven prontât des mans dal destin. E cheste e jere la ande dal nestri avocat.

_____________________________________

Il libri e l’autôr

A la fonde di chest romanç dal scozês Robert Louis Stevenson, scrit dome in trê dîs dopo di un brut insium, e je la nature ambigue dai umigns e il concet dal dopli. I esperiments dal dotôr Jekyll su la psiche umane a svein in lui chei istints che i principis de morâl e de convivence a cirin di scuindi: al è cussì che Mister Hyde (dal inglês to hide, platâ) si imparone dal cjâf e dal cuarp dal dotôr (strassomeat de tristerie fin a fâi pierdi la inficje di uman) par maglâsi di infametâts di ogni gjenar tes sôs gnotoladis ator par Londre. No cate la salût clopadice, Stevenson al à vût viazât in cetancj paîs: la France, i Stâts Unîts di New York al Colorado, fintremai lis isulis dal Pacific, là che al fo ospit e amì di Re Kalākaua des Hawai‘i. Chest spirt aventurôs si palese a fuart ancje tun altri dai siei classics, Treasure Island (La isule dal tesaur). ❚

Il tradutôr

Marco Stolfo al è dotôr di ricercje in storie dal federalisim e de unitât europeane, e si ocupe di politiche e dirits des minorancis, ma la sô ativitât no si ferme chi: la sô passion par la musiche si pant te trasmission Babêl Europe su Radio Onde Furlane, là che nus propon une cerce de produzion musicâl tes lenghis propriis dal nestri continent.

Tal 2011 al à publicât La mê lenghe e sune il rock (e no dome chel), un biel volum su la storie de musiche par furlan dai agns ‘70 in ca. Al à scrit cetancj saçs ispirâts a une vision moderne e dinamiche des nazions cence stât come sogjets atîfs de integrazion europeane, cetant lontans di chê rapresentazion comun ma false di monts sierâts che no comunichin. ❚