Premi di poesie San Vît a Stefano Montello

Cu la opare Nuviçute mê e sȗr, jessude par Samuele editore di Manià, Stefano Montello al à vinçude la sezion par furlan dal Premi di poesie San Vît, organizât dal comun di San Vît al Tiliment. Il libri di Montello, musicist dai Flk, agricultôr sociâl e scritôr, al è la traduzion in marilenghe dal Cantico dei Cantici, il libri de Bibie atribuît al re Salomon. Un lavôr scomençât 10 agns za fa, consultant cuatri versions talianis e la version in marilenghe par cure di pre Toni Beline. «In chê volte, o stavi studiant lis vilotis furlanis e, passant i Cantici, mi soi inacuart che no jerin cetant diviers dai cjants de nestre tradizion furlane. Tant al è vêr che, gjavant fûr doi tocs a câs e domandant di distingui cuâl che al fos chel de Bibie e cuâl chel di une vilote, in pôcs a rivavin a cjatâ la diference» al à spiegât Montello. Sedi il Cantico dei Cantici che lis vilotis a fevelin dal amôr, midiant di un idiome, une lenghe. «O ai ancje notât che la rassegnazion e je la stesse: une vene sentimentâl, di sperance amorose di lui par jê e di jê par lui, compagne». Stefano al è ae sô cuarte opare leterarie. Pe Forum, tal 2014, al à scrit Manuale ragionato per la coltivazione dell’orto, version taliane di Manuâl critic par il ort. L’art de la jeche, jessût tal 2008. Po La mia generazione suona il jazz, 2011. Dal an passât, L’albero capovolto. Le opere e i giorni in una fattoria sociale (edizions Bottega Errante), a cinc agns de esperience a Volpares, la fatorie sociâl che si cjate a Palaçûl.
✒ Oscar Puntel