SPECIÂL – Il biel e il brut

La impugnazion, la sentence, lis divisions_ La Cort Costituzionâl, cun sentence n. 159/2009, e à declarât la ilegjitimitât di cinc articui, su sîs impugnâts, de leç regjonâl dal Friûl-Vignesie Julie n. 29 dal 2007 su «Normis in cont di tutele, valorizazion e promozion de lenghe furlane».
Il ricors ae Consulte al jere stât presentât tal Fevrâr dal 2008 dal Guvier Prodi, che al veve ritignût che la leç e fos in contrast cun altris leçs dal Stât e in particolâr cu la leç 482/99 su lis minorancis linguistichis storichis.
La decision de Consulte – che si spietave za di cetancj mês daspò de prime sentade dal mês di Fevrâr stât – e je stade depositade ai 22 di Mai e e à jevât sù une vore di divisions, tacant dai stes judiçs dal organisim costituzionâl. De leture de sentence, di fat, si intuìs che su la cuistion no je stade unanimitât: il judiç relatôr, il vicepresident Ugo De Siervo, al à di fat rinunciât a scrivi lis motivazions de sentence, vadì in segn di dissension, e a lui al è subentrât il judiç Paolo Maria Napolitano (viôt l’articul te pagjine seguitive, n.d.r.).
I ûs publics_ La Cort e à tornât a marcâ il dirit di doprâ il furlan cu lis istituzions publichis, dut câs e à censurât lis normis de L.R. 29/2007 che a previodevin la pussibilitât di doprâlu ancje cui uficis de Regjon che no si cjatin intes zonis delimitadis. Declarade incostituzionâl ancje la norme che e stabilive di meti fûr in lenghe furlane i ats destinâts ae gjeneralitât dai citadins e lis comunicazions istituzionâls e la publicitât indreçadis a dute la regjon.
Cun dut che no si viôt parcè che la Regjon, inte sô autonomie, no puedi decidi lis sôs lenghis di ûs, al va dit ancje che gran part dai efiets «cassâts» a podaran sei distès ativâts dai citadins. La Regjon di fat e à uficis di rapresentance e URP ancje tes zonis furlanofonis e li si varà dirit di domandâ la plui part di chei ats ancje in lenghe furlane, tal plen rispiet de 482/99.
I organisims eletîfs_ Daûr de sentence, la leç regjonâl no pues lassâ ae autonomie dai Comuns e di chei altris ents lis modalitâts par garantî la traduzion a di chei che no cognossin la lenghe furlane intun Consei comunâl o intun altri organisim eletîf. La Cort e proibìs fintremai la ripetizion dai intervents in lenghe taliane o il dipuesit contestuâl de traduzion: masse pôc. Si varà simpri di garantî la traduzion simultanie. Une brute notizie par chei che a son cuintri i finanziaments pe lenghe furlane, parcè che di cumò indevant, seont la Cort, tai conseis comunâi al varà simpri di sei presint un interprete.
Toponomastiche_ Pe Cort, la nestre Regjon – che e à une competence concorinte, se no adiriture esclusive, in teme di toponomastiche – no podeve stabilî che i Conseis comunâi a podessin deliberâ la adozion di  toponims nome par furlan. Pecjât che, prime de L.R. 29, al sedi stât un Decret legjislatîf dal Guvier (il 267/2001, su lis autonomiis locâls) a previodi totâl autonomie dai Comuns inte toponomastiche (escludût il non dal Comun). E pecjât ancje che il Stât italian al vedi fat bogns uficialmentri miârs di toponims dome par furlan. E cumò, ce fin fasarano?
Scuele_ Nuie assintiment cidin («silenzio-assenso»). Nuie ûs veicolâr de lenghe furlane. Nissune ore a la setemane par furlan. Chest si è let tai gjornâi talians dopo la sentence de Cort. La realtât e je invezit une vore divierse, ven a stâi: la sentence e à «improibît» no tant che si puedi meti in vore i proviodiments descrivûts sore, ma il fat che e sedi stade la Regjon a decidilu.
Seont la Consulte, di fat, chês decisions a puedin sei cjapadis dome des scuelis stessis, se no si viole la autonomie scolastiche. Par tant une scuele e podarès decidi di fâ metât des oris par furlan par dut l’an scolastic, cu la benedizion de Cort. E reste malapaiade naturalmentri la Regjon che, a chest pont, no rive a capî ce che e vûl dî la competence concorinte su la scuele stabilide tal 2001 e specificade tal 2002 cuntun decret di metude in vore dal Statût.
La uniche vitorie_ La uniche vitorie de Regjon e je la pussibilitât di sostignî l’insegnament dal furlan ancje tes scuelis fûr dal teritori delimitât. Bontât lôr!
William Cisilino
____________________________
CE ISE LA CORT COSTITUZIONÂL?
Par podê dâ ae Republiche taliane une Costituzion fuarte, la Assemblee costituente e decidè – tal 1948 – di metile un scjalin parsore di dutis chês altris leçs. Par chest e nassè ancje la necessitât di previodi une Cort Costituzionâl, cul compit di judicâ su la legjitimitât costituzionâl des leçs e dai ats che a àn fuarce di leç, dal Stât e des Regjons; sui conflits di atribuzion fra i podês dal Stât e su chei fra il Stât e lis Regjons e des Regjons fra di lôr; in fin, su lis acusis cuintri il President de Republiche (ven a stâi alt tradiment e atentât ae Costituzion).
La Cort – clamade ancje «Consulte» – e je componude di cuindis judiçs nomenâts par un tierç dal President de Republiche, par un tierç dal Parlament in sentade comune e par un tierç des supremis magjistraturis.