Chel dai 4 di Dicembar isal stât un vôt autoNOmist?

Ancje se si è davuelt dome doi mês indaûr, al somee passât un secul dal referendum che al à mandât a Patràs la riforme costituzionâl che Matteo Renzi al veve sburtade cun fuarce: e la situazion taliane no je par nuie clare, stant che no si capìs ni se ni cuant che si larà a votâ. Gentiloni al puarte indevant lis riformis che al pues aprovâ cul jutori di une maiorance che e sarà ancje clopadice, ma che e somee tignî bot: e intant lis oposizions, di Grillo a Salvini, a ucin lis armis pes elezions. Tancj, massime Renzi, a varessin gust di lâ a elezions prin dal timp: ma la impression e je che a sedin cetancj di plui chei che a volaressin restâ a Rome fin ae fin de legjislature. Cuistion di pagnut?
La situazion si ingredee ancjemò di plui se si pense ae nestre Regjon, dulà che la presidente Serracchiani e la sô coalizion si son inçopedâts intun grum di sconfitis chest an. A àn cuintri la diestre e i grilins, come tal 2013, ma a àn taiât i puints ancje cuntune part de çampe (SEL nol esist plui e une part no je plui in maiorance). Il gradiment de Zonte al è stât misurât dal “Governance Poll” dal Sole 24 Ore, e l’esit al è stât brut: la Serracchiani e je rivade al tierçultin puest te classifiche dai Governadôrs.
E coventarès une gnove componente civiche e autonomiste par rinfuarçâ la coalizion a marche Pd: lu disin in tancj tal centri-çampe, di Mauro Travanut a Lodovico Sonego. A varessin vût dut câs di inacuarzisi prin, stant che il referendum al à definitivementri crevade ogni sperance di aleancis cui autonomiscj. Di fat, no ‘ndi è un in Friûl (ma ancje tes altri Regjons a Statût Speciâl, gjavât il Sud Tirôl) che al vedi votade la riforme Renzi-Boschi. E je stade viodude di fat come un atentât ae specialitât: e la difese de autoNOmie e je passade pe oposizion ferme a chest dissen di riforme de Costituzion.
Il Comitât Sono Speciale Voto NO al à rivendicât cun braùre il risultât, spiegant che inte nestre regjon la int e à capît che la riforme no judave di ciert la autonomie. Anzit, le meteve sot atac: e in prospetive e creave lis cundizions par un nivelament des regjons speciâls a chês ordenariis. No dome. La idee di une unificazion intune Macroregjon cul Venit e sarès stade ancjemò plui facile di atuâ. A pro nol è dome il centriçampe renzian, ma ancje buine part dal centridrete: i nemîs de autonomie a restin in vore, ancje parcè che la trasversalitât di chei che a considerin la specialitât come un residuât dai agns che a forin e je pardabon totâl.
Il pericul nol è duncje scjampât, nancje par ideis: e par difindi la pussibilitât di autoguviernâsi e covente cumò plui di simpri la nassite di une fuarce teritoriâl che e sedi buine di interpretâ lis domandis che a vegnin de nestre int e des nestris impresis. L’apel che al è vignût dai tancj che si son batûts pal No in prime linie, come Giorgio Cavallo, Roberto Visentin e Sergio Cecotti, al è che i zovins aministradôrs che si son fats i vues tai ultins agns a metin dongje lis fuarcis e si batin cuintri di un sisteme che al cjale il Friûl come une «pure espression gjeografiche».
L’apel al è za stât cjapât sù dai sindics dal Pat pe Autonomie e dai membris di altris fuarcis autonomistis come Patrie Furlane, ma ducj chei che si ricognossin intune vision peade al teritori cumò a son clamâts a une gnove sfide. La int furlane si fide simpri mancul des fuarcis politichis talianis, al somearès, e mai come cumò al podarès vierzis il spazi par une fuarce che si movi dome dal Friûl e pal Friûl, che e rivi a fâ soflâ gnovis bugadis di autonomie suntune tiere che a ‘ndi à une vore dibisugne. ❚
✒ Walter Tomada