NO SON PERAULIS PAR VECJOS. Spending review

Mandi, nono! Dulà vâstu?
Mandi frute! O voi in comun, a fâ la cjarte di identitât.
Cjale che vuê e je sierade la anagrafe!
Cemût? Di miercus? E je simpri stade vierte di miercus.
Lu sai, ma di un pâr di mês a àn cambiât orari, cumò a son vierts la metât des voltis.
Parcè mai, po? No vevino voie di lavorâ?
Ma no, nono, no son mighe chei che a lavorin che a àn decidût. Tu sâs cemût che e va, cu la spending review.
Splendi? A àn pôc ce fâ i splendits, se a gjavin i servizis a la int!
No “splendi”, nono, “spending”. Spending review.
Mah. No sai parcè, ma chestis peraulis inglesis mi somein un mût par freânus cence fânus capî che nus àn freâts. Ce isal cheste volte?
Spending review: “spending” e je la spese, “review” al vûl dî revision.
Ah, chê robe che e fâs ancje tô none, che e controle simpri il scontrin a cjase, par viodi che no i vedin batût in casse doi litris di lat invezit di un. Jo no le clami “splendi reviù”, le clami “jessi tichigne”.
No, nono, no “revision” in chel sens. Fâ spending review al vûl dî taiâ lis spesis, stâ atents di no butâ vie bêçs dulà che nol covente, riorganizâ lis robis par jessi plui eficients.
Ah! Sparagnâ! Covential clamâle “splendi reviù”? No varan mighe di vignînus a insegnâ i inglês a noaltris furlans cemût sparagnâ? Ma l’ufici dal comun ce jentrial?
Al jentre, parcè che la spending review e je une robe fate tal public, par ridusi il debit. Cussì a sierin cualchi servizi, a scurtin cualchi orari, a tain cualchi robe in mût di sparagnâ. Lu àn decidût a Rome.
Ah. E si son taiâts ancje la lôr pension?
No, nono, chê no.
Lis “auto blu”?
No crôt.
E dome il gno ufici dal Comun àno taiât?
No sai ben, nono.
Lu sai jo: cheste “splendi reviù” mi somee ce che e fâs tô none cun me: nuie tais tal bar o abonaments ae television par cjalâ il balon, ma cuissà parcè scarpis e sbelets no si puedin mai taiâ!
✒ Bete Di Spere