Onorificence ancje al professôr Lamuela pai 30 agns de grafie

“Al è impuartant che ducj i politics a valorizin la lenghe furlane, sostegnint il so ûs in ducj i contescj de vite. Chest al permet di vê une cognossince direte, cence traduzions, di un popul e de sô culture. E va preservade”. Cussì si è esprimût il professôr Xavier Lamuela martars ai 19 di Lui, a palaç Belgrât, ricevint dal president Pieri Fontanini la medaie istituzionâl de Provincie di Udin par vê puartade indevant cun fuarce la incarghe di codificazion de grafie furlane. «E je stade la Provincie di Udin intal 1986 – al à ricuardât Fontanini mostrant la delibare dal Consei provinciâl dai 15 di Lui di 30 agns indaûr – a fâ formalmentri il prin pas istituzionâl di chel percors che al à puartât la lenghe furlane a vê la proprie grafie uficiâl, un codiç di scriture uniforme e che e rispiete lis variis variantis, strument che al à permetût la realizazion dal Grant Dizionari Bilengâl Talian Furlan, dant sburt a la produzion editoriâl par furlan in ducj i cjamps. Par chest contribût fondamentâl al professôr Lamuela al va il ringraciament de Provincie di Udin».
E je stade la Aministrazion Provinciâl di Udin, vuidade dal president Tizian Venier, a domandâ al professôr Lamuela di elaborâ un test complet pe grafie de lenghe furlane, su la base des indicazions de comission a pueste istituide par chest fin: i components di chê comission a jerin Adrian Cescje (president che, dilunc dal incuintri, al à ricuardât i varis passaçs che a àn puartât a centrâ un obietîf impuartant di normalizazion de lenghe furlane), Silvana Fachin Schiavi, Giovanni Frau, Amedeo Giacomini, Aldo Moretti, Gianni Nazzi, Etelredo Pascolo, Nereo Perini, Giancarlo Ricci, Piera Rizzolatti e Eraldo Sgubin. Fondamentâl il rûl di chei che a jerin i assessôrs provinciâi ae culture Oscarre Lepre e Giacomo Cum. Peraulis di preseament pal contribût impuartant dât dal professôr Lamuela ancje de bande dal president de Arlef Lorenzo Fabbro,.
La propueste elaborade dal professôr Lamuela, che partint dal sisteme grafic di riferiment doprât de Societât Filologjiche Furlane le à perfezionade suntun model di lenghe normalizade basade su la tradizion leterarie dal Friûl centrâl, e je stade duncje adotade ai 15 di Lui dal 1986 de Provincie di Udin. A son passâts altris 10 agns e intal 1996 cul decret dal president de zonte regjonâl dai 6 di Novembar dal 1996, daûr dal art.13 de L.R.15/96, la lenghe furlane e à vût la sô grafie uficiâl. (LPdF) ❚