SPECIÂL – Dal stadi Moretti a Terençan di Puçui

An 1971: su la carbonele de piste dal stadi Moretti di Udin a corin i plui brâfs campions dal mont tal speedway. Un compens pe storie motociclistiche dal Friûl, che dal secont dopovuere al fo l’unic puest di Italie dulà praticâ chest sport (di no dismenteâ i nons di Luigi Fantuzzi, Mario Calligaris, Giordano Bon, Mario Rupil e Renzo Travagini). Ae gare pal campionât dal mont al stadi Moretti a jerin plui di 18 mil spetatôrs. La presince americane e inglese dopo la seconde vuere mondiâl e fo il motîf dal amôr dai furlans viers cheste dissipline.
IL CIRCUIT CUMÒ_ Tantis personis a van a viodi ancje cumò lis garis a Terençan di Puçui, dulà che al è un dai pôcs ovâls di Italie ancjemò vierts. L’ovâl di Terençan al è stât viert tal 1972, par opare de Polisportive Olimpia di Terençan, che e veve dentri ancje une sezion motociclistiche. Di chê volte, a son stadis une vore di garis talianis, europeanis e mondiâls, tant individuâls che a scuadris.
Un puest li che si respire un aiar particolâr: a difarence di altris cjamps di gare plui o mancul nobii dal ovâl di tiere, achì si sta come in famee. Ducj insiemit ator de piste, fameis interiis, tancj fruts, maris, paris e nonos comprendûts. Cu la cuvierte distirade sul prât, a mangjâ hot dog e pan e salam.
Davide Francescutti