DI SCJAS IN SCJAS: I TARAMOTS INTE STORIE FURLANE. Il ribalton dal 1511

Nol coventarès di sigûr spiegâ parcè che il 1511 al rapresente un  rût ribalton, un vêr laboratori, e cetant impuartant, par rivâ a capî cierts moviments, no dome de tiere, ma ancje de societât e de sô complicade anime plurâl, in cheste nestre tribulade Tiere dal Friûl. Si rive un pas ae volte ae grande Apocalìs, che in cualchi maniere e rapresente un confin inte storie de Patrie, jenfri il prin e il dopo.
Il ‘400 si jere a pene sierât cui Turcs. E subit dopo, Vignesie nus dissanganave cu la vuere cuintri l’Imperadôr, a partî dal 1508, durade par plui di vot agns: paîs brusâts, oms obleâts a lassâ il lavôr dai cjamps par lâ a scombati berlant “Vive Sant Marc”, maçalizis e cjaristie. Ancje la peste e je vignude a cjatânus, che simpri e salte fûr de sô tane cuant che la miserie e decît di fâ il so nît jenfri i umans. Ai 27 di Fevrâr dal 1511, la dì di Joibe Grasse, intune Udin incjocade dal Carnevâl, al sclope un dai plui grancj riviei popolârs e contadins da la Europe, stiçât di dôs fameis, i Savorgnans e i Torians, che a rapresentavin ancje i doi partîts plui rabiôs, i Çamberlans e i Strumîrs, ven a stâi chei che a volevin il Leon di Sant Marc e chei altris che invezit a preferivin la Acuile Imperiâl. Sanc, cjistiei brusâts, un rituâl di muart e di violence dificil di distudâ.
E a un mês dome di distance, velu un dai taramots plui trements de storie, un Orcolat furiôs che al à fat dams ancje vie pe Italie, in Istrie, in Carniole e intes Gjermaniis. Nus al àn contât i scritôrs e i cronichiscj plui impuartants di chê ete, di Martin Sanudo a Gregori Amaseo, cun peraulis plenis di maravee: a Udin a son colâts jù cjistiel e lobie vecje, chê dongje de glesie di Sant Zuan. Prime il penacul dal domo e po dopo ducj i cjamins des cjasis, e cun lôr une pestadice di rudinaçs di fâ pôre. Di sot tiere si veve sintût a businâ un aiarat puçolent, come di solfar, e par mês cheste peste stomeose si le sintive vie par ogni borc de citât. A Cividât e jere vignude jù la Glesie, la tor di Sant Domeni, chê di Sant Francesc e chê dal munistîr in Val. E inte seconde scosse, chê dai 8 di Avost, a jerin stâts ancjemò altris disastris inte antighe capitâl langobarde, e plui di trê mil vitimis a jerin restadis sot des maseriis. Madone di Mont e Faedis a vevin tremât tant che une schene sot des vuiscjadis dal mostri. Dal cjistiel di Tarcint dome une spice di piere e jere stade sparagnade. Di Osôf e Pinçan pôc o nuie si jere podût salvâ.
Come il solit, Glemone e veve vût di gloti la piês bocjade, cambiant dal dut il so profîl urban. E no dome inte citât, ma sù intal alt, fin al dormitori di Sante Agnês, e il munistîr di Sante Clare, cu lis glesiis di Sante Marie la Biele e di Sant Blâs. Al fo interpretât tant che un segnâl orent il fat che lis crôs a jerin coladis jù, insiemi cul bielissim tor des oris, e il so orloi, un svant par dute la comunitât, e lis muracis di difese a jerin stadis dal dut savoltadis, tacant de Puarte dai Mus fin ae torate de Bataie. Adiriture, si jere crevade par lunc la mont Glemine, e par doi mês la aghe dal Fontanon, su la place, e jere stade scure di pantan. La scosse e veve ridusût in nuie ancje il domo di Tumieç. La sgrife dal taramot e rivarà a fâ dams fintremai a Sacîl, là che e fo butade par tiere buine part dal Palaç antîc dal Municipi, il tor di Sant Nicolau, cun tantis cjasis e cjamins. La corint de Livence si jere fermade, cun grande sorprese dai testemonis. La conte e fo di miârs di muarts. A Pordenon, prime che il tor si spacàs, a vevin sunât lis cjampanis a muart, cence che man umane e tocjàs la cuarde. Un segnâl sigûr dal Cîl o dal Infier. ❚
✒ Agnul Floramo