COGNONS DAL FRIÛL.

Midiant de storie dai cognons furlans, si fâs ancje la storie dal nestri Friûl. Chest mês, stant che si fasaran lis Olimpiadis a Rio, in Brasîl, us proponìn cognons di atletis furlans che a saran in gare.
(Gjavâts fûr di I cognomi del Friuli di Enos Costantini e Giovanni Fantini ed. La Bassa/LithoStampa. O ringraciìn i autôrs pe disponbilitât e pe colaborazion).
BRAIDOT (BRAIDA, BRAIDOTTI)
Al ven di braide, tiermin che al indiche «un toc di teren avonde grant fûr dal paîs». Une braide e pues jessi ancje dongje di cjase, ma ni piçule, ni sierade, a diference di un broili o di un bearç. La forme Braidot si cjatile a Mosse, Vierse, in comun di Romans dal Lusinç e a Gurize. Intal 1545 al è segnât a Gramoian un Giovanni Braidotto qm. Zuanne della Villa di Rualis; intal 1598 une casa Braidotta; intal 1600, scrit ancje Braidot, si cjatilu a Muimans.
CAINERO
Al podarès vignî dal non todesc di persone Heiner (-ei si leilu –ai e –H al pues deventâ –C tes lenghis romanzis), variant di Heinrich, ven a stâi Indrì. Cognon ben presint a Udin e a Remanzâs (chi il Mulino Cainero che al à molât la ativitât intal 1992); presint a Cividât e a Tavagnà. Intal 1185 Kainerus de Porto a Cividât; 1466 Cainer a Dartigne; 1573 Zuan di Vignut Cayner de Malazump; intal 1528 Girolamo Cainero “Dominiciano” notaio di Udine.
MIZZAU
Cognon tipic di Bean, in comun di Codroip. Si pues pensâ che al vegni di un non par todesc di un paîs no par fuarce logât intun lûc gjermanofon: intal Imperi asburgjic, i paîs che a jerin in Slovenie, Cechie, Slovachie e v.i. a vevin la traduzion par todesc. Il paîs però, no vin rivât a individuâlu. Si cjatilu numerôs a Bean za ae fin dal Cuatricent in formis variis: Mizau, Mizao; Mizaum; Mizanno; Mizzau. Par esempli: 1496 iuxta campum rectum per Colaum Mizaum de Beano.
ROSSIT (ROSSITTI, ROSSITTO)
Diminutîf di ros, il colôr: al è une vore probabil che al vegni duncje di une carateristiche fisiche di persone. Intal 1337 a Spilimberc: post domum dominae Borgae iuxta domum Jacobi dicti Russitto de Raussetto. La forme Rossit si cjatile a Pordenon intal 1545: Tomaso q. Ser Pietro Rossits detti del Sal.
TROST
Si lu cjate des bandis di Gurize: 1722 Andrea Trost decano di Santo Vitto di Vipacco; 1722 Thomaso, Filippo, Gioseff e Urban Trost, vignaioli in Santo Vitto. ❚