La bataie dai Referendum Un comitât autonomist pal «no»

Intant che chest numar de La Patrie dal Friûl e je in stampe, a son daûr a davuelzisi lis elezions aministrativis in tancj dai nestris comuns, cual chidun ce tant impuartant. Su lis nestris pagjinis o viodarìn il mês che al ven ce panorame che nus presentaran. Duncje o fevelarìn di altris votazions che si fasaran indevant: i referendum.
Chei cuintri des uti e par une Regjon Friûl-Triest a son stât depositâts di pôc in Regjon cu lis firmis che a coventavin, e ce tantis di plui. La consegne e je stade ai 30 di Mai, la stesse date che si jere tignude un an fa la prime riunion dai promotôrs di Tuttiperilfriuli, cuant che al jere presint pre Meni Zannier, tra i prins a firmâ. Cumó l’Ufici di Presidence dal Consei Regjonâl al à di valutâ la lôr amissibilitât. Propit ai prins di Jugn, vie par un incuintri a Rivignan, l’impuartant costituzionalist Mario Bertolissi de Universitât di Padue ju à definîts no dome impecabii te forme ma un grum di valôr te sostance.
Dut câs, prime al vignarà un altri referendum: chel pe modifiche de Costituzion, in atomp, proponût dal Guvier e presentât tant che un plebissît dal President Renzi. Un altri pas bande l’acentrament dai podês al Stât talian, fiscant la autonomie de Regjon F-VJ.
Al somee che une “clausule di difese” e permetarès aes Regjons speciâls di restâ cussì, ma no si san i tiermins de tratative. Intant, di sigûr il gnûf Senât al discrimine lis minorancis linguistichis de nestre Regjon, in plui de discriminazion par vie des circoscrizions e dai coleçs de gnove leç eletorâl Italicum.
Al è par chest che Patto per l’Autonomia/Pat pe Autonomie si sta movint par che si costituissi un Comitât pal NO al referendum, parcè che «la logjiche dal plebissît no nus è apartignude mai e no nus aparten cumò, soredut in cheste fase de nestre Storie.» Apontament ai 10 di Jugn intun lûc simbolic: Cosean. Il paîs che al à votât cuintri il plebissît pe anession dal Friûl al Ream d’Italie, e che di alore si cognossilu tant che Cosean dal No. ❚
✒ Dree Venier