IL SANT DAL MÊS – Sant Anselm

Sant Anselm di Cividât, duche dal Friûl e abât di Nonantule (13 di Fevrâr)
Anselm (Cividât, 723 d.C. – Nonantule, 803 d.C.), di çocje langobarde, si jere fat un non tant che duche dal Friûl e sorestant des schiriis langobardis; po al bandonà responsabilitâts politichis e onôrs e al fondà te Val dal Panàro, des bandis de Emilie, un romitori cun tant di ospizi pai pelegrins. Vude une donazion dal re dai Langobarts Astolf, so cugnât, e fasintsi judâ dai siei munics, al tirà sù a Nonantule, dongje de citât di Modena, un monasteri cu la glesie, leât a la regule di San Benedet. Deventât abât, al lavorà cun dute la passion par tornâ a une vite sante, par suvidî i malâts tai ospedâi e par promovi la leterature, l’art e la culture dai cjamps. Al operà di mediatôr intai contrascj fra i Francs e i Langobarts.
Al murì ai 3 di març dal 803 e il so cuarp al fo sapulît inte glesie dal monasteri. ❚
Test gjavât fûr dal Messâl par furlan, di agns in spiete de aprovazion di bande de CEI (Conference Episcopâl Taliane).