70 AGNS DI PATRIE DAL FRIÛL. IL FERÂL. Felix Marchi: une vite par une idee

Daspò tancj agns o ai tornât a lei cheste interviste che pre Antoni i veve fat a Felix Marchi, om che si fevele pôc di lui. E pûr al è stât une grande figure dal autonomisim furlan, anime, fondadôr, pari di “Patrie dal Friûl”. In cheste interviste al palese fuarce e libertât interiôr, luciditât di pinsîr, intuizion, capacitât di sielzi lis personis justis, tal moment just. Pre Antoni, si palese bulo ancje come intervistadôr che, cu la sô curiositât, al rive a tirâ fûr tantis notiziis, tantis sfumaduris, tancj passarins di une grande aventure.
(pre Roman Michelot)
____

Ai 24 di Fevrâr dal 1946, juste za 40 agns, al è jessût il prin numar de PATRIE DAL FRIÛL, “sfuei setemanâl indipendent”. L’articul di fonde al jere “I furlans e l’autonomie”, par dî che plui atuâl di cussì si mûr. Al costave, pai letôrs, 10 francs. Ma par Felix Marchi e pe sô femine Marie, che lu vevin pensât, imbastît e parturît, al jere il presit di une vite.
In cheste tabaiade cul pari e cu la mari dal autonomisim furlan, fate te lôr barache di Mediis ai 23 di Avost dal 1983, o vin volût tornâ a vivi insieme chei moments e chês vitis. Ancje par un insegnament par nô, che si ritignìn erêts e dal gjornâl e dai ideâi. Cumò Marchi al cjamine par 97 agns ch’al varès dute la buine voe di finîju ai 26 di Lui.
D.:Tune vite di batae lungje e coerent come la vuestre, al è simpri un prin moment, un cjaveçc. Cemût vêso coqnossût il furlan e si sêso inamorâts di cheste nestre realtât?
R.: Pal mont, come che ur sucêt a tancj di lôr di inacuargisi dal ben cuant che no si lu à. Jo o soi nassût a Udin e mê mari e jere mestre e, come in dute la buine borghesie udinese, ignorante e cagone, si fevelave che slacare di dialet venit-udinês. Furlan nancje discori. Cuant che i câs de vite o il destin mi àn puartât pal mont, in Chine, mi soi intivât intun muradôr ch’al vignive dal Friûl. Sintîlu a fevelâ e capî ch’o vevin il stes sanc al è stât dutun. Di li e je partide la mê batae.
D.: Ce pas vêso fat par rivâ a di chel fevrâr di za corante agns che e je jessude la «Patrie»?
R: Jo o soi un om che, ben o mâl, cuant che o fronti no moli. Tal moment de liberazion mi à parût ch’al fos rivât il moment just pal Friûl, par che il popul furlan al podès rivâ a di chel «di bessôi» che jo mal sintivi dentri vie. Cuant che a son rivâts a Udin i aleâts a liberânus (o a parâ vie chei altris par metisi lôr), la prime bandiere zale e blu metude fûr sul barcon e je stade la mê. Che di fat un pulizai al à corût sù in cjase a dînus di tirâ vie chê robe li se no o lavin a cirîsi disgraciis. Al pensave, te sô ignorance, che si tratàs de bandiere di Tito. E chei altris, plui ignorants ancjemò, no rivavin nancje fin li.
D.: Cuale jerie la idee di fonde?
R: Il Friûl al à une so identitât, une sô storie, une sô muse. Al à dirit di vê une sô indipendence. Bisugne fâ alc par rivâ li e chê mi someave l’ocasion buine, dopo voltade la pagjine dal fassisim. A jerin moments di confusion, là che però al jere lecit ancje di pensâ a alc di gnûf, di diferent. Ch’al sarès chel famôs «di bessôi».
D.: Ma par cont di culture, di lenghe, di leterature, no veviso za la Filologjiche?
R: Tasìn, va, ch’al è miei. Co Mussolin no le à disfate, al vûl dî che i lave ben. E se i lave ben a lui, no nus lave ben a nô. A cjacaravin dome par talian e a fasevin publicazions tal mont de lune o ch’a costavin un voli dal cjâf. E jere robe di massonerie.
D.: Vêso cognossût cualchidun che si svicinave ai vuestris ideâi?
R: Tellini. Chel mi à parût il plui convint Al bateve la nestre cjase e nus mostrave ancje cualchi so scrit par furlan. Lui però al jere a nivel culturâl e inteletuâl plui che politic. Al diseve che no si à di pierdi la «ladinitât».
D.: Veviso avonde unitât di ideis sul «progjet Friûl»?
R: La plui part di lôr a disevin di fâ une regjon Friûl peade cûr e anime a Rome; une sorte di piçule Patrie fie de grande Patrie. Tellini al pendeve par fâ a uso un cjanton svuizar. Jo o ài vude simpri chê peraule tal cjâf: indipendence, par jessi veramentri di bessôi
D.: Cemût vêso tacât a inmaneâ cheste batae?
R: La prime robe che si veve di fâ al jere di dâ dongje un moviment culturâl-politic, par butâ jù cuatri ideis e par viodi il mût di puartâlis indenant. O ài pensât al moviment autonomistic furlan.
D.: Jerie une vuestre matetât, une vuestre sperance o sintiviso ch’al jere il moment just?
R: No jere ni matetât ni inlusion ni sperance. O ài simpri vude, te me vite, une certe sensibilitât e mi soi dit: «Chest al è il moment. O curnò o mai pluil» E «di bessôi»; la base e je dute li! Si viodeve lis dificoltâts ma, s’al jere vêr che il Friûl al jere «un piccolo compendio dell’Universo», no si capive parcè che nol podeve guviernâsi di bessôl
D.: Ce int veviso tirade dongje?
R.: A jerin moments che no si podeve mateâ, plens di suspiets e di spions. E alore o ài pensât di parâ indenant, a mostrâ la muse, int buine, di sest, ma che no faseve pôre e che no jere cjalade di neri. O vevin metût il cont Odorico de Pace, po un cert Giovanni De Campi, che par dî la veretât nol valeve trop, ma ben nô o podevin fâ la nestre vore. E dopo, pai comizis e par cjapâ il mont catolic, o vin tirât dentri Tessitori. Al jere chel che nus bateve ducj come bardele. Nô o cirivin di batilu cu lis ideis.
D.: E de bande, disìn cussì, comuniste o di çampe?
R.: No sintivin di chê orele. A jerin impeolâts cu l’Internazionâl e no vevin ni timp ni voe di pierdisi daprûf di cantins «locâi», limitâts, di provincie. O vin vude plui udience tal mont catolic.
D.: E parcè, cuant che si veve di riva al concret, i catolics àno sirucât?
R: Parcè che e jere la cuistion dal comunisim ch’al meteve in preson gardenâi e vescui e int. E di chê altre bande la glesie catoliche che, pluitost di lâ sot dal comunisim o di tentâ di fâ un toc di strade insieme, e spesseave a scomunicâlu e dâi jù, preferint Hitler, Franco o adiriture Satane. Par no colâ sot di lôr, miei butâsi cun cualunche altri. Di li la politiche «nazionalistiche» de glesie. E il Friûl, ch’al jere tun puest balarin, par no ch’al colàs sot di Tito lu àn peât mans e pîts cun Rome e cul Vatican. Cussì o sin deventâts lis sentinelis de Religjon e de Patrie. A di chest pont fevelâ di indipendence al jere come fevelâ de lune tal poç.
D.: Ma vualtris no vês molât istès no.
R: E parcè varessino vût di molâ, co l’idee e jere sacrosante? Pal vescul Nogara e pe Curie di Udin? O pai missins? Il vescul al jere il piês nemì, chel ch’al veve in man ducj i spâi e che ju tirave cuintri di nô.
D.: Sichè la mafie catoliche, il predessam e il vescul si son metûts cuintri di vualtris. Ma di ce us acusavino?
R: Di jessi titins. Un boborosso ch’al à funzionât di simpri. A disevin ch’o tiravin bêçs dai todescs o di Tito par tradî la Patrie. Ch’e jere, nancje dîlu, dome l’Italie.
D.: In cheste clime nol jere tant ce ridi. Cemût us ise vignude tal cjâf di fâ un gjornâl?
R: Nassude l’associazion autonomistiche, nus metevin in jenfri ligjeris e traditôrs e sabotadôrs di ogni pêl par fiscânus. Alore o vin dit: Chi al covente un sfuei. Par fâ sintî la nestre vôs e par tignî colegaments di idee e di azion. Se no, cence gjornâl, no rivarìn in puart di nuie. Tant plui che Tessitori, ch’al jere la nestre plere, nus al veve comprât la DC. E lui, par sta cu la DC, al à tradide la idee di autonomie che si jere partîts. Al à tradits ancje i contadins furlans.
D.: Cun ce bêçs veviso di meti in pîts chest gjornâl?
R.: La cuistion no jere che dai bêçs, che nô si lavorave ducj a gratis e dut ce che jo o vevi lu metevi li. La cuistion e jere chê di cjatâ fûr chel che lu scriveve.
D.: E cemût vêso cumbinât?
R: Par cumbinazion, un mi à mostrât il «Cjarmat». O ài letis un pâr di poesiis e o ài dit: «Chest al è chel ch’al pò fa il gjornâl!» E al jere pre Bepo Marchet. Jo no savevi cemût cjatâlu fûr. No vint pratiche dal ambient, o soi lât a cirîlu in Domo, in Curie, in seminari, là ch’a son i predis. E li si sa che pre Bepo noi veve udience. Alore mi àn dit là ch’al jere a stâ e o soi lât cjase sô.
D.: Cemût isal stât il prin incuintri?
R.: Pre Bepo no lu veve mai dismenteât «Mi si è presentât su la puarte – al contave – un toc di om, cuntune biele barbe blancje. Mi à someât di viodi un profete dal Vieri Testament. E mi à proponût di fâ il gjornâl. Jo o ài cirût di fâi capî lis dificoltâts, ma lui mes cjonçave une daûr l’altre, par intaiade. Mi diseve: Jo o soi il cjar armât ch’al sdrume e lui al sarà chel ch’al fasarà sù».
D.: Pre Bepo jerial convint che la batae e mertave fate?
R: Al jere convint ma, jessint predi e ancje om di ambizion, al saveve ch’al lave a cirîsi dome fastidis, tant de bande dal gleseam e de massonerie che dal Stât. In chei timps la glesie e la massonerie a podevin, almancul uficialmentri, plui di cumò e, inteligjent come ch’ al jere, al saveve che si zuiave l’avigni, parcè che jo no jeri une compagnie di batile par un predi e lis mês ideis no judavin lafè a fâsi strade inte scuele. Ma a fuarce di fuarcis, o vin tacât cul prin numar. Al jere il 24 di fevrâr dal ’46.
D.: Leint i prins numars, ch’a jerin une vore clârs come idee, no si cjate la firme di pre Bepo. E di fat, cuant che la Nuova Base e à publicat il libri su pre Bepo «La Patrie», chei editoriâi li no vevin la firme dal professôr. La domande e je cheste: jerino o no jerino di pre Bepo?
R:Nô o jerin a stâ in vie de Pueste e ogni setemane pre Bepo al vignive a cene li di nô, Nus diseve simpri: «Jo o scuen lâ almancul une volte par setemane là di Marchi parcè che lui mi dà la cjarie. Cuant che o rivi a la fin de setemane (il sfuei al jere setemanâl), jo mi sint disvuedât dal dut. E Marchi mi tire sù di suste». Jo i davi lis ideis di fonde e lui, (cun chel penâl d’aur ch’al veve, lis butave jù. In pratiche un al cjamave e chel altri al traeve. Cence vantâmi, o crôt di podê dî che, cence di me, pre Bepo al sarès stât simpri il grant filolic e artist, ma no il grant storic e politic furlan,
D.: Acetavial subit lis ideis?
R:Cuant che jo o sbaravi che i Furlans a vignivin fûr dai Celts e che i Romans a jerin carognis, lui, inamorât de classicitât e dal latin, si sustave. Podopo, un pôc a la volte, al vignive de me.
D.: E cussì e je nassude la «Cuintristorie». .
R.: A proposit di «Cuintristorie», pre Bepo, di bon storic positivist, al voleve i documents. E documents and jere dome o romans o a pro de romanitât. Jo i disevi: «Ch’al cjali prin dai romans! Ch’al ledi plui indaûr!» E cuant che lui mi domandave i documents che i Romans a vevin robât e copât, jo i rispuindevi: «Cui isal chel pote ch’ al cope e po al lasse scrit ch’al à copât?» Jo o vevi tal gno cjâf une mê intuizion; un telâr de storie, «cuintri» di chel uficiâl. E pre Bepo lu à jemplât cui fats, in biel ordin. Par chel si pò dî che la «Cuintristorie» le vin scrite insieme. Ancje se, come ch’al è di just, e passe come une vore di pre Bepo. Ma a mi mi interesse che la int e cognossi la vere storie; nol covente ch’a sepin che le ài inmaneade ancje jo.
D.: Cemût mai che, scrite la «Cuintristorie», pre Bepo si è uso suiât almancul come politic?
R.: Viodint che la robe e lave (si faseve, ta chei agns, 13.000 copiis de «Patrie»!), a àn scomençât a ruvinâ il grop par dentri, ricatant pre Bepo (a vevin chê di mandâlu in Sardegne) e puartant vie, un a la volte, ducj chei ch’a vevin scomençât a scrivi par furlan. Lelo Cjanton, ch’al vût fat ancje di diretôr, Dino Virgili, Riedo Pup e tancj altris a son saltâts fûr di li e dopo a son passâts di chê altre bande. Di Pup, o ài di dî ch’al è stât il plui galantom, il plui onest. Pre Bepo, par salvâsi, al à scrit ancjemò alc di filologjie e po, tor il ’60, al à finît dal dut
D.: Vignint sù, o ài cjalade la vuestre biele plêf di Castoie e o ài pensât:«Cjale che biele glesie, cussì fûr dal mont e contornade dome di muarts!» Seont vualtris, la glesie furlane o romane ise stade dentri o fûr de storie?
R: No à judât a vivi. Nuie. A àn cirût di consolâ alc par chê altre vite, ma no àn judât in cheste. A jerin cui siôrs, Grandis predicjis sul bal, su lis maniis lungjis e curtis, cuintri dai vizis dai puars, ma mai su la justizie o sui siôrs. Almancul chei ch’o ài cognossût jo, orco bestie, e ce raze! A àn savût dome insegnânus a ubidî. A savevin dî dome che l’«autorità viene da Dio». Cun lôr al pò lâ sù cualunche delincuent o ditatôr. Baste che ju lassi funziona e dî rosaris. Cumò al scomence alc di lusôr, di just, cun vualtris, cu la vuestre sielte di tornâ cu la int
D.: Ancje nô, di fi in pari, o rivìn a pre Checo, a pre Bepo e a Marchi. O sin vuestris nevôts.
R: Jo no merti tant ma o ài gust di sintîlu, Al vûl dî che no si semene mai dibant, ancje se si à simpri chê impression.
D.: Veviso combatût tant te vuestre vite?
R: Simpri! O vevi i pulizais simpri daprûf. E soredut chei altris si fasevin fuarts parcè che a vevin la istituzion che ju protezeve. Lôr a vevin l’«impunità del potere». Chel ch’al riscjave o jeri simpri jo. E alore mi jeri fate une mê filosofie: «Scomparire! Trai il clap e scjampâ». Ma scugnî stâ vuardâts dute la vite, par denant e par daûr, di talians e di furlans, di nernîs e di vendûts, e je dure.
D.: Esistie une recipe par tirâ indenant in chestis cundizions?
R: La prime e je l’indipendence economiche. No àn di vê lôr la cjace de mignestre, se no ti fasin crepâ di fan. La seconde: cjonçâ dutis lis lidrîs cui fradis, cui gjenitors, cui parincj. Si à di jessi radicâi e invulnerabili. Par no che ti tachin, no tu âs di dâur rimpins. Ancje par chel nô no vin volût vê fruts. Nus varessin tacâts par li.
D.: Strucant; ce podêso dî de vuestre esperience?
R: O vin cognossude tante int, o vin tirade sù tante, ma la plui part si stufin, si lassin fâ pôre o si lassin comprâ. O la famee o il lavôr o il gjaul e sô mari, si reste simpri in pôcs, Par tirâ indenant une idee, un gjornâl, un partît, bisugne jessi libars, completamentri libars.
D.: Veviso mai vude pôre?
R: Une pôre umane ti ven e ancje cualchi moment di strache, ma cuant che tu sintis di dî robis justis e di fâ robis justis, e passe ancje la pôre. Bisugne lâ indenant, simpri. Se no ti copin di piçul, come Erode, dopo no rivin a copâti plui, parcè che la veretât e cjape pît!
D.: La glesie no à judât. E la scuele?
R: Salvant cualchidun, o scuen dî che la raze dai mestris e dai professôrs a son une raze impestade. Simpri a insegnâ daûr comant «Servitori fedeli dell’ordine costituito». Ancje s’al jere «disordine costituito». I imprenditôrs a jerin sclâfs dal capitalisim, i mestris de scuele nazionalistiche, i predis de glesie e cussì la puare int, intrigade a tirâ indenant, e je restade te ignorance e te pôre.
D.: I furlans sono plui stupits di chei altris?
R: Nol è ch’a sedin plui stupits. E di fat il lôr inzegn e mistîr lu mostrin. A son dome disgraciâts. E no esist une graduatorie dai disgraciâts. Par chel nol è just dâur jù e maltratâju.
D.: Chê altre dì un di Cjanfuarmit, fevelant di vualtris, al à dit che «Felix e Marie a son stâts il pari e la mari dal Friûl ch’al cîr di saltâ fûr di pupîl». Us àial deludût chest fi, il Friûl?
R: No, parcè che, di cuant che si à scomençât, o vin viodût a cressi tantis bielis robis. E ce che no si podeve nancje fâsi sintî a dî za corante agns, cumò si pò dîlu cence nissune pôre. No ’nd è tant spirt di Patrie ma chel al ven cul timp. La int, magari cussì no, ti ven daûr cuant che e viôt che i torne cont a lâ di chê bande. I prins a àn di lâ indenant par fede, parvocazion, cence pretindi nuie.
D.: Tra coragjo, bêçs e fuarce politiche, cuâl covential di plui?
R: O disarès il coragjo. Ancje parcè che si pò jessi plens di bêçs e cence ideis. I politics po vuê a son cun te e doman a son cuintri, parcè che a pensin par sè e no par te. Jo o disarès invezit che e covente une grande intuizion, di riva a capî il moment just e la persone juste. No àio vude une buine intuizion jo a dâi in man la «Patrie» a lui? Ancje se, jessint dipendent di une gjerarchie pestifare, al varà ce tossi.
D: Esistial un segret che us à permetût di rivâ a la vuestre etât, traviers un mâr cussì periculôs, cence pierdi l’onôr?
R: Jessi simpri se stes. Alore ancje il plui grant nemì di ideis o di partît ti stime. Dopo, s’al è pussibil, si à ancje di cirî il mût di tratâ. O disarès ch’al è plui impuartant fâsi amîs che no nemîs. Ancje parcè che nemîs and è za avonde.
D: Butie plui la polemiche o la persuasion?
R: A conventin dutis dôs. No lâ a cirî la barufe, ma nancje maridâsi par fuarce. L’union e à di jessi su alc, se no ce union ise? E dure di Mediis a Viâs,
D: Vualtris o vês provât di dut miserie, taramot, bondance, vuere. Cuale di chestis robis ise stade la piês pal Friûl?
R: La vuere parcè che e je une porcarie orende e la miserie parcè che ti cjol la dignitât e ti poche a cirî un paron.
D.: Tornaressiso a fâ ce ch’o vês fat?
R: De prime a la ultime dì. Parcè che o vin viodût che la lum no si è mai distudade. Daûr di nô o sês vualtris e daûr di vualtris ant sarà di altris, parcè che la libertât e fâs part de vite e fin che ant sarà vite, ant sarà simpri cualchidun che si bat pe libertât dal Friûl. ❚
La Patrie dal Friûl, n. 1 Zenâr 1986