Cui sono? Si son dâts dongje su iniziative dal sindic di Rivignan-Teôr, Mario Anzil, l’avocat che al à vuidât ancje il progjet di fusion tra chei doi comuns de Basse. I àn rispuindût in tancj: almancul in tresinte ae fin di Zenâr, te prime tape di racuelte des firmis a Rivignan; e po un centenâr a Pordenon, la dì di Sant Valentin, no cate la ploie. Zovins e vielis, int stufe nere dai solits partîts e moviments, ex esponents dal autonomisim furlan, aministradôrs comunâi e provinciâi, cualchi vip e fra chei il president de Provincie di Udin Pieri Fontanini, pre Meni Zannier, il diretôr di TelePordenone Gigi di Meo. Ducj a àn firmât la lôr adesion a doi referendum di iniziative popolâr di mandâ in Regjon. Curiositâts di social network: 4.388 personis a àn metût “mi plâs” ae pagjine Facebook dal grup. Su Twitter, poie ancje dai socialiscj triestins, che a àn screât l’ashtag #tuttipertrieste.
Ce domandino? I doi tescj – studiâts e scrits di Anzil cul jutori di juriscj e tecnics – a son un abrogatîf e chel altri propositîf. Chel abrogatîf al domande di scancelâ il gnûf sisteme des autonomiis locâls, fondât su 18 Uti, ven a stâ mini provinciis (une situazion che o saressin di fat ducj sot Triest, lu à dite, in mût sclet, l’assessôr Torrenti). Tuttiperilfriuli lis definìs «costosis e ineficientis». Chel altri referendum, il propositîf, al domande di riformâ la regjon sul stampon dal Trentin-Sud Tirôl: in pratiche si tratarès di creâ dôs provinciis autonomis, une pal Friûl e chê altre par Triest. «Un model che za al à dimostrât di funzionâ ben, di costâ mancul e di jessi in grât di determinâ il disvilup economic dal teritori dulà che al è aplicât», al dîs Anzil. E nol è un câs che al è il stes model che al veve tal cjâf Tiziano Tessitori.
Cuâl il program? Tra i ponts plui impuartants sostignûts dal Comitât in cheste propueste e je la valorizazion de vocazion mitteleuropeane di Triest e de nature “policentriche” dal Friûl, che e podarà vê plui cjâfs lûc di provincie, la valorizazion di dutis lis minorancis linguistichis de Regjon e la atribuzion ai comuns di un rûl fondamentâl. Al spieghe Mario Anzil, puartevôs e prin citadin di Rivignan-Teôr: «La sovranitât e à di jessi restituide al popul furlan e il referendum al è l’imprest plui democratic che al esist. Cheste iniziative no varà di jessi strumentalizade, ma trasversâl. O volìn che il popul furlan al sedi dut un par sburtâ une ricostruzion istituzionâl che i dedi la juste dignitât. Dopo a podaran vignî i ponts di viste diviers e ancje i partîts, ma cheste imprese e à di burî fûr de unitât dal popul furlan».
A ce pont sino? O sin inte fase che Tuttiperilfriuli al sta tirant sù lis firmis par sostignî i doi cuesîts. A coventin 500, di trasmeti al Ufici di Presidence dal Consei Regjonâl che al à di valutâ la amissibilitât. Il grup al larà ancjemò indevant, a tirâ sù firmis, fintremai ae metât di Març, propit par vie che e je la int a domandâlu. Dopo il bon acet di chel orghin, si passe ae fase doi. A coventaran lis firmis di 15 mil citadins, dentri de fin dal an. Se chê racuelte e passarà, si sarà clamâts al vôt te Vierte dal 2017. ❚
✒ Oscar Puntel