Stâts gjenerâi pe autonomie: par salvâle e par infuartîle

Stâts gjenerâi pe autonomie: une ocasion dulà che ancje la glesie furlane e sarà presint par pupilâ une cundizion, la autonomie de Regjon Friûl-Vignesie Julie. Cun di fat, no cate lis rassigurazions che a rivin in prin de presidente de Regjon Debora Serracchiani, “e je percepide a risi ancje di front de linie neocentralistiche dal Stât”, al conferme bonsignôr Guido Genero, vicjari gjenerâl de Arcidiocesi di Udin.
Une idee, cheste dai Stâts gjenerâi, che “a titul personâl” i jere vignude a lui za fa cualchi timp e che cumò e à passonât tant di jessi diretementri cjapade sù di cualchi socie cul impegn di inmaneâju. Par cumò al lavôr a son lis associazion “Friuli Europa” e “Mitteleuropa”, cun a cjâf rispetivementri Renzo Pascolat e Paolo Petiziol, ma si spiete la adesion ancjemò almancul di une altre tal comitât promotôr.
MACHINE AMBIZIOSE
Par chel che al rivuarde i timps, si pense di rivâ adore a realizâ chescj Stâts gjenerâi “tai prins mês dal prossim an”, al previôt bonsignôr Genero, “tratantsi di un machine ambiziose e ancje complesse”. Tai intindiments, cun di fat, al è chel di clamâ adun – a nivel regjonâl – dutis lis istituzions, des Universitâts aes Glesiis, des Scuelis ai Sindicâts e vie indevant par meti ae fin une firme sot di une mozion che e disi a clâr che “la autonomie e à di jessi mantignude e rinfuarcide”. Intant chest, al rimarche Genero, cence lâ a dibati ator de organizazion interne de regjon.
In prin, in sumis, al è di meti un cantin fer su cheste volontât e po ancje si à di sclarî ce che si vûl intindi par autonomie. Che bonsignôr Genero su chest une idee clare le à: “La Autonomie si à cuant che e je une disponibilitât utile e adeguade di risorsis”. Duncje ancje su chest pont la mozion e varès di jessi clare, par vie che “a son diferentis concezions di autonomie, che non pues jessi però dome promessis o ridusude a cualchi fiscalitât di vantaç”.
GUVIER E PARLAMENT TE SMIRE
La mozion che e saltarà fûr di chescj Stâts gjenerâi e sarà presentade al Guvier e al Parlament.
Se si domandi a bonsignôr Genero parcè une autonomie ancjemò cumò – stant che, in Italie ma forsit cualchidun al è ancje in Friûl, a son cuissà trops indotorâts, politics e studiôs che si spitichin a dî che je passade chê ore, che cumò no covente e che no à sens -, lui al rispuint cu la convinzion che i diven di vê vivût gran part dai 50 agns di Statût speciâl dal Friûl-Vignesie Julie. “O ai fate esperience di ce che al jere il Friûl tai agns Sessante, tai  Setante e po dopo dal taramot. Bisugne vê memorie par savê cuale strade che al fat il Friûl e trop che in chest troi e à zovât la autonomie”. Si che duncje, “a son resons etnolinguistichis, di posizion gjeografiche, di capacitât dimostrade di savê dâi concretece al principi di sussidiarietât che a fondin la reson che cheste regjon e sei autonome”.
IL RÛL DE GLESIE
Ma parcè ancje la Glesie saraie un dai sogjets che a puartaran aghe a chescj Stâts gjenerâi? Bonsignôr Genero al sotlinee il stîl di une glesie tal rapuart cu la tiere dulà che e je impastanade, ven a stâi la plantatio ecclesiae. “La Glesie e je simpri peade a strent cu la storie, cu la gjeografie, cu la culture dal teritori e de int. In chê cundizion li si ricognossìn”. ❚
Antonella Lanfrit