Cjamaris Di Cumierç: la oligarchie di Pordenon e la sô “boutade” antifurlane

Miôr Vignesie che il Friûl. La solite anime antifurlane che e sabore su Pordenon e che e je in mans ae solite borghesie industriâl (za in passât, cu la puce sot dal nâs par dut ce che al è furlan) e à sparniçât la ultime gnove in teme di agregazion fra Cjamaris di cumierç de regjon, come che al proviôt un specific dissen governatîf, par taiâ lis spesis e rindi plui eficients i servizis ae impresis. Cussì, bot e sclop, si ven a savê che te sentade dai 14 di Setembar, la Zonte de Cjamare di Pordenon e à deliberât ae unanimitât di “inviâ une istance aes cjamaris di Cumierç di Gurize e Triest (che za si stan federant par lôr cont, ndr) par metisi intun unic Ent. In câs di rispueste negative o mancjante, a sarà inviât il stes invît ae Cciaa di Vignesie”. Il test tra virgulutis al è cjapât fûr dal comunicât stampe inviât propite te stesse dì. E a stret zîr, al è rivât il “raus” di Gurize: propueste dineade.
SPIRT ANTIFURLAN?_ Al va dite che, stant al riordin che si pensave, Gurize cun Triest di une bande, Udin e Pordenon di chê altre – un riordin che al veve almancul une sô logjiche tune continuitât teritoriâl e di vicinance aes impresis – Pordenon si è simpri mostrade cetant stiçose. Forsit la pôre di sparî, mangjade di Udin (e dal rest nol è che finint cun chês altris dôs la mignestre e cambi masse). Forsit la pôre di pierdi cjadreis e  rapresentativitât (e dal rest la razionalizazion e je la fin de operazion). Forsit chel spirt antifurlan, a sô volte fi de “borghesie venite di “Pordenone città”, dispès imigrade tai agns Sessante de provincie di Trevîs, in gracie dai tancj puescj di vore che la Zanussi a veve creât”, cemût che al à vût dite Paolo Fontanelli, president dal Comitât pe Autonomie e pal Rilanç dal Friûl, che si domande ancje se chê stesse borghesie e sedi puartevôs des istancis di dut il Friûl di là dal Tiliment e no dome di un bocon. “A Pordenon a varessin di cjalâ oltri la ponte dai pîts, ricuardant che l’obietîf al è chel di rapresentâ dute la Provincie e no dome il centri storic dal cjâf lûc”, al à zontât Fontanelli.
DELIBARE FÛR DE VADE_Tai efiets, la delibare de Cciaa di Pordenon no je stade chê grande cjatade. Ubaldo Muzzatti, di Cordenons, cognossût tal mont culturâl e par passe 20 agns consulent tecnologjic e di organizazion aziendâl, al à vût scrit al Messaggero Veneto su la cuistion: “Mi domandi se chei che a volaressin fâ “at di dedizion a Vignesie” si rindin cont des dificoltât logjistichis e dai coscj in plui che a saressin cjamâts sui utents di Pordenon e di chel toc di Friûl. E ce dî dopo de “mosse a cjaval” par saltâ la casele Udin e cori cun Gurize e Triest? Sino sigûrs che utents e associâts, in grant part dal teritori e no dome de citât, a saressin contents di jessi separât dal lôr ambit naturâl, ven a stâi il Friûl?”
ISOLAMENT_Te realpolitik dai ecuilibris istituzionâi, la Cciaa di Pordenon si è di fat autoisolade. La volontât di unîsi a Vignesie? “Une boutade”, al dîs il president dal ent di Udin, Giovanni Da Pozzo. “La leç no previôt unions fûr dai confins de regjon e cumò Pordenon al varà di gjestîsi une situazion che si è creade di bessole”. Udin al podarès ancje continuâ a esisti cence unîsi a nissun, in virtût des deroghis pes provinciis di confin. “Ma nonostant chest – al zonte Da Pozzo –, nô no vin mai metût palets o firmâts documents che a previodevin prime un percors di union a doi par po rivâ a dome une Cciaa regjonâl”. Di Palaç Morpurgo, insome, a disin che lis puartis a son simpri viertis, ancje pal fi prodic. Dome che il fi prodic si jere raviodût. Chi, invezit, o sin ancjemò lontans. ❚
Oscar Puntel