Gaeltacht, lis “isulis” li che si fevele il gaelic de isole irlandese

Lis zonis de Irlande li che si fevele tant che marilenghe il gaelic irlandês, prime lenghe uficiâl de Republiche, a son definidis cuntune peraule gaeliche “Gaeltacht”. A son une vore piçulis rispiet al teritori irlandês, e a cjapin dentri une popolazion di uns 85.000 di lôr.
A son stadis delimitadis tai agns Cincuante e a son protezudis dal Department of Community, Rural & Gaeltacht Affairs, dutun cul Ministeri pe Lenghe Gaeliche. Une sorte di “risierve naturâl linguistiche” in sumis, ma ancje cussì parfin tal Gaeltacht i locutôrs dal gaelic a son simpri plui in minorance.
In dutis lis zonis dal Gaeltacht lis indicazions stradâls e i nons des viis a son scritis dome in irlandês (ancje se cheste sielte in cualchi câs e à provocât fuartis polemichis di bande dai abitants, che la eliminazion dal inglês e prejudicarès il turisim). Il stes al vâl par documents publics e targhis memoreativis. Ma altris insegnis, tant che par esempli chês dai ristorants, a son al contrari cuasi dutis dome par inglês.
Tal rest de Irlande, in dutis lis scuelis si insegne il gaelic in omaç ae tradizion e ae ondade nazionalistiche che e à puartât ae indipendence de isule intal 1921; ma intai agns 70 l’irlandês al è stât gjavât fûr dai esams finâi obligatoris. Di decenis, duncje, i arlêfs a son obleâts a studiâ irlandês, ma a scuegnin da râr dâ une serie dimostrazion des lôr cognossincis linguistichis.
I tescj di dutis lis leçs a van emanâts in lenghe irlandese, che e fâs test in câs di ambiguitât. Inte prassi, però, chest nol ven aplicât. Pal plui, pes sentencis al ven consultât dome che il test inglês, e cualchi volte la redazion in irlandês e ven publicade dome intun secont moment.
In rapuart al numar dai feveladôrs, la leterature irlandese e je une vore vivarose. A son diviers festivai e premis leteraris. Inte plui part des ediculis e librariis si puedin cjatâ libris in irlandês, ancje se metûts vie dispès intun cjanton separât. ❚
✒ Dree