SLOVENIE. I numars de Slovenie te cuestion de imigrazion. Ancje Lubiane cuintri i acuardis di Bruxelles

Ancje in Slovenie, intal ultin periodi, tra i temis al centri de atenzion publiche e je la cuistion dai imigrâts e dai dispatriâts. La Comission europeane za a metât di Mai e veve decidût di introdusi un sisteme di cuotis pe redistribuzion dai rifugjâts e che a fasin domande di asîl in Europe. Ogni stât membri de UE  al varès purpûr un contribût di 6.000 € par ogni persone acetade.
Par ce che al tocje i rifugjâts presints intai cjamps intai paîs confinants cun chei al centri di crisis politichis e avigniments belicôs (par esempli i dispatriâts sirians rifugjâts in Jordanie), ae Slovenie e jere stade assegnade une cuote dal 1,03 par cent, che al corispuint a 207 rifugjâts. L’Alt Comissariât des Nazions Unidis pai Rifugjâts al à racomandât ae UE di acetâ e di ripartî tra i paîs plui o mancul  20.000 rifugjâts. Ae fin di Mai a Brussel, par judâ i stâts membris interessâts di un aflùs improvîs di migrants, e je stade presentade ancje une propueste pe redistribuzion, in dute la UE, di 40 mil sirians e eritreus in cercje di asîl che si son rifugjâts in Italie e in Grecie. Intal decidi cemût redistribuîju, si à tignût cont dal numar dai abitants, de situazion economiche dai paîs singui (PIL e tas di disocupazion) e dal numar di rifugjâts za acetâts intai agns di prime. Su cheste base, la Slovenie e à otignût une cuote de 1,24 par cent, che al significhe 297 personis tra chês rifugjadis cumò in Italie e 198 tra chês rifugjadis in Grecie.
In totâl, duncje, la Slovenie e varès di acetâ 702 rifugjâts (suntun totâl di plui o mancul 60 mil). Al va zontât, a titul di esempli, che l’an passât la UE e veve regjistrât plui di 600.000 domandadis di asîl, che di lôr a son stadis acetadis 186.665.
Il prin ministri Miro Cerar, comentant il sisteme des cuotis, al à di subite declarât che la Slovenie e vûl jessi solidarie intal frontâ il probleme dai migrants, ma che e vûl cautele e al covente tignî cont des carateristichis di integrazion dal paîs e garantî un adeguât nivel di sigurece interne.
La discussion su la cuistion dai rifugjâts in parlament e je invezit ore presint in cors. Il partît dai democratics slovens SDS (che e je une formazion politiche di centri diestre) al à presentât une interogazion cjatant pericui di terorisim e di sigurece interne, sotlineant intal document presentât in parlament che il stât islamic al veve declarât che tra i dispatriâts a saressin ancje combatents de Isis, che il lôr compit rincipâl al sarès chel di compî atentâts teroristics in ducj i stâts membris.
intant, al vertiç dai ministris dai internis de UE a Lussemburc, là che si è discutût dal sisteme des cuotis pe ripartizion dai rifugjâts, il ministri sloven Vesna Györkös Žnidar al à declarât che la Slovenie, pûr ancjemò cence vê definît in parlament une proprie posizion uficiâl, no je dacuardi cun ce che al è stât decidût in Mai a Brussel. La Györkös Žnidar e à sotlineât che la solidarietât e à di jessi volontarie e no imponude, e che a àn di jessi cjapadis in considerazion lis pussibilitâts e specificitât dai stâts, e ancje la cuistion de sigurece. Secont il guvier sloven chescj aspiets, cussì come il pericul di imigrazion par vie de posizion gjeostrategiche, no van gran trascurâts. La Slovenie e jentre cussì intal grup di stâts membris che a volaressin une solidarietât basade su la volontarietât e duncje su la libare sielte dai paîs singui. Su lis sôs stessis posizions  a son ancje Republiche Ceche, Slovachie, Lituanie, Polonie, Spagne, Ongjarie, Romanie, Bulgarie e Cravuazie.
Par ce che al tocje la opinion publiche, al va citât un scandai fat al principi di Jugn pal cuotidian sloven Delo. Cuasi il 70% dai intervistâts si è dimostrât favorevul a acetâ e a sostignî i dispatriâts che a vegnin de Afriche. Dome un cuart si è oponût ae lôr rivade. Cuasi la metât dai intervistâts al à declarât di aprovâ il sisteme di cuotis pe ripartizion dai rifugjâts inte Union europeane; i contraris a son plui o mancul un tierç. Al va però sotlineât che al moment dal scandai si fevelave dal acet in Slovenie di dome cirche 200 rifugjâts. ❚
Tjaša Gruden