SIMPRI BOGNS. AA.VV. La comugne, numars 0 + 7 + 25

“Tal panorame editoriâl furlan no mancjin publicazions ator de leterature furlane o di riflession culturâl sul furlan. In cetantis di chestis edizions no si fâs fadie a intivâ poesiis. Une vore plui dificil invecit al è cjatâ altris formis di scriture, altris produzions leteraris là che la lenghe furlane si met a la prove par inmagâ cui che al lei, intun mont che in gracie di jê al nas e al devente…”
Al jere il Dicembar dal 1997 e l’incipit dal editoriâl dal numar zero de gnove riviste La Comugne al nunziave il principi di une inovazion pe nestre lenghe, metint il dêt su la plaie: in furlan si cjatave tante poesie e pocje o nuie prose. Di culì la necessitât di fâ respirâ la lenghe, di alçâle doprantle par narative, senegjaturis, fumuts, drams e radiodrams, traduzions, intervistis, saçs, contis, flabis, storie, geografie e vie in devant.
Une scomesse azardose: varessie cjatâts i bêçs par tignîsi in pîds? varessie vût un bon numar di letors? la lenghe saressie stade a la altece? e i autors?
Poben: cumò che o sin intal 2015, o vin in man il numar 25 de riviste. Che, plui i vot de prime schirie, a fasin un totâl di trentetrê numars. Al va dit che i prins a vevin une consistence une vore plui grande: il numar zero al veve cuindis articui, il numar vincjecinc al à dome siet. Se chest al è un limit, al va dit che al è za un piçul miracul di viodile ancjemò vive e vivarose. Une riviste di leterature furlane no pues mancjâ a une lenghe che e vûl vivi e che e vûl cressi. La Comugne e à vût propi cheste funzion in chescj dibot disevot agns e le à davuelte une vore ben.
Une sielte inteligjente e je stade chê di dâi spazi e impuartance a la fotografie. Ogni numar al è imbastît su une part scrite e une grafiche e lis fotografiis a son simpri stadis bielis, simpri di valor artistic, storic, naturalistic. Inta chest ultin numar a son fotos di piçui nemâi di Marco Cuoco che i dan un valor zontât a la riviste, parie cui cuadretuts di Rafaele Serafini.
Cui che al va cirî il Friûl di une volte, la plovisine, il folklor e la nostalgje, il salt, onest e lavorador, nol à di cirî di chestis bandis. Culì il nivel de lenghe al è une vore alt, i contignûts a son problematics, pençs, no metin sucar su la realtât, a metin pevar, a sticin domandis, a sbreghin certecis, ti oblein a pensâ su. A fasin il mistîr che e à di fâ une riviste serie, ma che, se al covente, e je ancje buine di une biele ridade.
Al è dome di augurâsi che e puedi lâ in devant. Par altris trentetrê numars e po ancjemò altris sessantesîs. Po si viodarà. ❚
Laurin Zuan Nardin