Comunitât Linguistiche furlane: 65 Comuns ae prime sentade

A disin che il Parlament de Patrie si è riunît pe ultime volte tal 1805, cuant che Napoleon lu veve di sierâ: a son duncje 210 agns che intal Salon dal Parlament de Patrie dal Cjistiel di Udin no si da dongje la comunitât furlane. Ma al sarà propit culì che ai 15 di Lui a lis 18 si tignarà la riunion che e screarà la Assemblee de Comunitât Linguistiche furlane: il gnûf organisim che la riforme dai ents locâi e permet di meti dongje par rapresentâ i intindiments e i interès dai furlans. E no sarà une assemblee par cuatri gjats: a son 65 i Comuns che a àn manifestade la intenzion di partecipâ aes riunions. E 40 a àn za deliberât formalmentri la lôr adesion” nus spieghe Diego Navarria, sindic di Cjarlins che al à coordenât il procès di costituzion de Assemblee adun cun Massimo Moretuzzo, prin citadin di Merêt.
IL PLOTON
Pe politiche furlane e je duncje une situazion inedite ma cetant interessante: ancje parcè che in chest ploton di Comuns e di sindics no àn volût mancjâ ni Udin, la capitâl dal Friûl, che e ospitarà ancje la prime sentade, ni Gurize, citât di simpri cussì furlane che parfin la Filologjiche e à vût alì la sô scune tal 1919. E si pues dî che e je ancje concrete la pussibilitât che fintremai il Comun di Pordenon – dulà che i furlaniscj no somein cuissà cetancj – al podarès deliberâ la adesion dentri de prime metât di Lui. E al sarès une vore significatîf che ducj i trê i cjâf lûcs furlans a fossin protagoniscj di chest organisim.
PUARTIS VIERTIS
Te operazion di costituzion de Assemblee a varan impuartance ancje lis  proceduris. La presidence de prime riunion e sarà afidade al sindic dal Comun plui popolôs, Furio Honsell, ma za te prime riunion al vignarà nomenât il president e il diretîf. Par garantî une plene rapresentance ancje a nivel teritoriâl, doi dai cinc puescj tal diretîf a saran destinât a Comuns di là da la aghe e dal Friûl Orientâl. E il mecanisim di funzionament al previodarà simpri la puarte vierte par ogni Comun che al volès agregâsi intun secont moment. Chest propit par lassâ che ancje chei che no àn rivât a aderî (o no àn volût) a puedin fâlu intal avignì.
UNE RAPRESENTANCE TERITORIÂL FUARTE
“Nol è stât facil rivâ a un numar cussì penç di adesions – al spieghe Moretuzzo – parcè che a son ancje Comuns che a àn fat ricors cuintri de Leç di riforme dai ents locâi e no àn ritignût par chest di votâ la adesion a un organisim che al nas propit inte suaze di chê riforme”: e je sperance che intun doman cheste situazion e cambi, ma intant za i 65 Comuns a son un grant risultât. Ancje parcè che si sint simpri di plui la bisugne di une rapresentance teritoriâl fuarte che e dedi vôs aes comunitâts. Lu àn pandût ancje lis Lezions di Autonomie che a son ladis indevant par dut il mês di Mai cuntun bon sucès di partecipants e soredut une grande cuantitât di contignûts che a rivin ducj ae stesse conclusion: a cui che al vûl l’autoguvier i covente un spazi politic. La situazion e je duncje rivade a un pont di grant interès: e la Assemblee e pues rapresentâ un imprest ideâl pe discussion su la autonomie. A pat di savêle doprâ. ❚
Walter Tomada