EDITORIÂL – Aquilee nus clame ae Resurezion

✽✽ Ogni volte che si cjatìn te basiliche di Aquilee o vin di visâsi parcè che o sin culì e in ce maniere che e je nassude cheste tradizion. Pre Checo Placerean e Glesie Furlane le vevin viodude juste fintremai di chê Istât dal 1977, decidint di celebrâ ducj insiemi la fieste di Ermacore e Fortunât e di rinovâ ogni an l’impegn a batisi pal popul furlan e pe sô libertât.
✽✽ O vevin reson a tignî dûr cun cheste manifestazion ancje in chei moments dulà che al someave dut pierdût e sparniçât, glotût de prepotence dal pinsîr talianot o pûr masse debil par rispuindi a dutis lis agressions, sociâls, economichis e culturâls, dai sorestants. Di chenti e forescj.
✽✽ Ancjemò plui impuartant al è il cjatâsi chest an cuant che a son tantis lis iniziativis che si dan dongje in non de autonomie e dal Friûl, parcè che cence Aquilee, cence lis lidrîs dai siei valorôs, no si va di nissune bande.
✽✽ Il motîf al è subit clâr: o podìn fâ dutis lis bataiis di chest mont pe autodeterminazion, pe difese de specialitât, se o volês ancje pe indipendence, ma se no metìn i contignûts a chestis formis di istituzions sociâls, si cjatarìn, prime e dopo, a jessi come chei altris, a simiotâ esperiencis di guvier che no àn nuie a ce fâ cu la nestre storie e, soredut, cui nestris siums e ideâi.
La societât furlane e à di vê un riferiment par parâsi des propuestis e dai dams produsûts de globalizazion, dal individualisim, de monede e dal marcjât tant che valôrs unics.
✽✽ Mi ven tal cjâf la nestre tiere: le vin cimentade, si sin inventâts prime la culture intensive de blave, nancje che o fossin la Americhe, e po dopo de soie. Cu la ilusion di fa bêçs, o vin sdrumât i cjamps e fat tuart ae nature.
Jerial chest l’insegnament cristian di Aquilee o pluitost il so contrari?
Il messaç no jerial invezit chel de armonie dal dut, de salvece universâl e duncje di oms e feminis libars di fâ sù il lôr destin?
✽✽ Nol covente jessi crodints par partî di Aquilee e rivâ al dì di vuê, par confrontâsi su ce Friûl che o vin tal cjâf. Simpri pre Checo al pensave che “il Friûl o al sarà cristian o nol sarà”: jo o crôt che no sedi une cuistion di religjon, ma di buine volontât chê sì. E  viodût che il messaç dal Vanzeli al è propit par chei che a dimostrin di vêle, mi somee che si puedi lâ indenant ancje di bande dal mont laic in cheste direzion.
In sumis, e je rivade la ore di ribaltâ la logjiche ancje politiche e di pensâ al popul no tant che un alc di anonim, bon dome par paiâ lis tassis, votâ par chei che a son stâts decidûts de sede dai partîts, e soredut sotan.
✽✽ O fâs un altri esempli: la riforme de sanitât. Vino di lâ daûr a sieltis che a àn la fonde tal sparagn o tal ben de int? E se si à di sparagnâ, vino di taiâ i ospedâi o i stipendis dai dirigjents? Vino di invistî inte ricercje, te universitât, o mantignî une schirie di burocrats regjonâi? Si podarès lâ indenant su ogni sielte dai governants che tra l’altri a son simpri plui espression dome dai lôr interès e dai lôr afârs.
✽✽ Se duncje alc di gnûf  si môf par rapresentâ l’interès dai furlans, al è benvignût. Nus plasarès che nol feveli di Pil e di bancjis, ma di lavôr e di rispiet dal ambient, di justizie e no di racomandazions, di lenghe e culture furlane, di vierzi e no di sierâ scuelis, di gnovis stalis e no di eletrodots, di dignitât e no di assistenzialisim, di svilup e no di straçariis. Di migrants come oms e no numars.
✽✽ Tal timp istès propit di Aquilee, ancjemò une volte, si jeve la clamade al popul furlan par che nol dismentei lis sôs lidrîs e il so puest te storie: une storie di Resurezion. ❚
Dree Valcic
****
A pagjine 10 l’articul su la Messe di Aquilee pal Avôt dal Friûl in ocasion de ricorence dai Sants Ermacure e Fortunât,  nestris Patrons. ☛