I furlans a son furlans: i neologjisims che si inventin par fruçâ il Friûl smentîts di un scandai restât masse platât

Te seconde metât dal 2014, la Union des Provinciis dal Friûl-Vignesie Julie e à fat fâ al “Centro Studio Sintesi – Istituto di Ricerca Sociale ed Economica” di Mestre un studi demoscopic cul titul di “La Provincia e l’Identità dei Cittadini”. Il scandai al veve chê di fâ viodi la impuartance de provincie pai citadins, no dome dal pont di viste aministratîf, par fâi cuintri ae scancelazion dal ent. Par dute une serie di motîfs, il document nol à vût la difusion che i voleve, probabil parcè che cualchidun si spietave rispuestis diviersis.
Il studi al è particolarmentri valit par vie che al è stât prontât di un istitût di ricercje cualificât e esterni ae Regjon (e duncje no condizionabil), fat in dutis lis cuatri provinciis (e duncje cun orientaments e interès di difindi diferents): se si lei il document intîr si viôt la impostazion professionâl e neutrâl.
Ancje il fat che i risultâts no sedin stâts sparniçâts e rimarcâts a fuart dai media locâi e je une prove de sô bontât: come che si viodarà, chescj numars a descrivin une realtât ben divierse di chê che e ven contade.
Il studi al cjape dentri tancj aspiets tant che: il preseament dal ent provincie, il sens di partignince aes istituzions, e vie indevant. In chest articul no volìn fevelâ di dut il studi, ma viodi di un scandai li che si domandave: “Se lui al ves di definîsi, a cuale di chestis identitâts si sintial plui dongje?”
Lis rispuestis vignudis fûr par ognidune des cuatri provincis si viodin te tabele publicade al inizi dal articul.
I infografics parsore a smascarin lis pretesis puartadis indevant di chei che a vuelin dividi o dineâ il Friûl e i furlans. Cjalìn dome chel pordenonês. Par agnorums cualchidun al à batût su une imagjinarie “identitât pordenonese”. I numars invezit a disin che in Provincie di Pordenon a vuelin jessi clamâts furlans in percentuâl sù par ju compagne di chê de Provincie di Udin. “Pordenonês” si definissin pôc plui dal numar dai residents de citât. Come chei di Udin, par altri: une robe simile che però in merit a “Portus Naonis” e ven esaltade cence recuie.
I dâts, po dopo, a disin che a son trê lis provinciis di maiorance furlane. Trê e no une! E a Pordenon in percentuâl sù par ju di chê udinese, duncje il Friûl nol pues jessi confinât te Provincie di Udin. A Triest si pues viodi che in citât e provincie si definissin “triestins”: dome une piçule minorance si dîs “julian” (magari a son juste chei che lu scrivin sul gjornâl o lu disin par television).

Tal infografic chi in bande, i numars a son integrâts daûr de consistence demografiche di ogni provincie fasint il cuadri complet de Regjon. La identitât furlane e risulte prime, pûr gjavant i risultâts des “identitâts citadinis” di Udin e Pordenon. Di notâ – come che si diseve  – che chê juliane e risulte scuasit la ultime, e “furlan ocidentâl” al è cussì piçul che al finìs tal totâl dai “altris”. Chest dât – tant par dî une – al da fuarce ae propueste di cambiâ il non de Regjon in “Friûl e Triest”. Altri che bati tant par gjavâ il tratut jenfri F-VJ, inventantsi identitâts che, come che si viôt, no esistin. ❚
Ubaldo Muzzatti / Redazion