MUSIS DI…FACEBOOK. No stâ a dâi di blave al “troll”

La Patrie dal Friûl e je presinte ancje su Facebook cuntune sô pagjine. Un imprest par difondi il gjornâl, ma ancje par incuintrâ e dialogâ cui letôrs e cu la int che e baline pal social network. Cheste rubriche e fevele di lôr e di ce che al zire ator par chest “social network”…
✽✽✽
Une des ativitâts che nus capite di fâ sul “Muselibri”, dongje di condividi fotos di gjatuts, articui, e contâ ai amîs ce che o vin fat, e je chê di discuti e comentâ chel che disin i altris. Il scambi di ideis al è une des bielis robis dal “Muselibri”. Al pues capitâ, però, di cjatâsi devant un “troll”. Il troll, come che si dîs tal mont digjitâl, al è un sogjet che al interagjìs cui altris utents cun messaçs provocatoris, fûr tema o cence sintiment, juste par infastidî. Il tiermin al ven fûr di une creature de mitologjie nordiche, il troll, di forme umanoide, innomenade pal so compuartament trist o fastidiôs.
CE FÂ? 1) Il consei – aromai scuasit une regule – che a dan i studiâts de rêt al è di ignorâlu: par solit al mole dopo di un pôc. Duncje “no dâi di blave al troll”. Tant al è dibant cuestionâ cuntun che al scrîf dome par dâti fastidi. Tirait il flât e no rivolzeitsi a lui nancje par disiji “no rispuint a chestis sflocjis”. Fevelait cun chei che an gust di resonâ. Tai câs di un che o viodeis che al insist, che lu cjatais ator simpri a rompi lis citis, Facebook al à une des soluzions che al è un dai fatôrs di suces di chest social network: blocâ une persone (l’opzion si cjate tal control de privacy). Lui no us viôt e voaltris no viodarês lui. Ogni tant o capirês dai coments di cualchidun altri che al sta barufant cul troll di cui no podês viodi i coments (ju vês blocâts) e us vegnarâ di pensâ: «puar mai te, jo o ai risolt il probleme di plante fûr» e o presearês il fat di vê une vite plui serene cence cuestionâ par dibant.
Ma la soluzion plui biele e je se o vês une “Pagjine”. Di fat si pues “platâ il coment”: il nestri troll e i siei amîs lu viodin e ancje voaltris (cussì o podês controlâ ce che al dîs) ma i vuestris iscrits ae pagjine no. Insumis, cussì i tiei letôrs no lu lein e lui nol sa di jessi scancelât e nol à a ce dî: perfet! ❚
Dree Venier