FRIÛL EUROPE. 2015, e covente plui Europe par jessî de crisi de Europe

La crisi de Europe e la dibisugne de Europe, di une Europe divierse che e sedi «plui Europe». Il 2015 al è tacât sù par jù ta chê stesse maniere dal an passât e al palese ancjemò plui a fuart la contradizion di fonde che e tocje il procès di integrazion continentâl e lis istituzions europeanis.
De economie aes relazions internazionâls, al salte fûr simpri plui a clâr chel che si pues calcolâlu tant che il pecjât origjinâl di chês che a jerin lis Comunitâts europeanis e duncje de Union europeane di cumò. Cuâl isal? Al è il fat che chês e chê a divegnin – e soredut a dipendin – dai Stâts nazionâi, che storicamentri a son «superiorem non reconoscentes» e duncje a stentin a passâ a nivel continentâl – ma ancje a nivel substatâl – lis cuotis di sovranitât e di podê che a coventin. Cuant che lu fasin, lu fasin di sante scugne e cirint di molâ il mancul pussibil, soredut tai passaçs simbolics e concrets plui impuartants. Cussì a mancjin la legjitimitât democratiche e la fuarce operative che a coventaressin e la Union europeane (Ue) e je mancul Union di ce che e varès di jessi.
Se a tacâ de fin de Seconde vuere mondiâl fintremai ae conclusion de Vuere frede, la cussì clamade crisi dai Stâts nazionâi – ven a dî il fat che chê statâl e je une dimension in chel stes masse piçule e masse grande rispiet aes dinamichis economichis, politichis e sociâls – e à zovât al disvilup de integrazion europeane, cumò si viôt che chê stesse crisi e je la fonde de crisi de Europe, che e riscje di vignî scjafoiade des formis gnovis de ideologjie nazionaliste, des tendincis viers de centralizazion dal podê a nivel statâl e des recipis tecnicistichis e economicistichis, fatis indenant in non di une presumude razionalizazion de bande di sogjets che dispès no si capìs pardabon cui che a son e cui che a rapresentin.
In cjamp economic il probleme nol è l’euro, ma al è la mancjance di politichis monetariis e fiscâls unitariis europeanis. Alc dal gjenar al salte fûr ancje intun altri setôr impuartanton in dì di vuê, cemût che al mostre il conflit politic e militâr che al è in vore in Ucraine. In chest câs la mancjance di une politiche unitarie e autonome de Ue no si palese dome tes tratativis fatis cu la Russie e cu la Ucraine (de Gjermanie e de France, no de Europe), ma ancjemò prime tai rapuarts tra la Ue e la Nato, massime dopo de fin de Vuere frede. ❚
Marco Stolfo