IL GRANT LUNARI DAL FRIÛL. Març

UN AGRÂT AL AUTÔR
Simpri gjavade fûr dal libri “Il grant lunari dal Friûl. Sants, fiestis e tradizions dal cicli dal an” (Pasian di Prât, 2012), e va indavant la colaborazion cun Mario Martinis che chest an nus propon un gnûf teme pe sô rubriche, cjalant il cicli de nature.. ❚ ✒ Redazion

IL SORELI, LA ATMOSFERE, LA NATURE
Il soreli, bandonât l’emisferi austrâl, al scjavalgje l’ecuatôr celest tal ecuinozi de Vierte (21 di Març), cuant che la durade dal dì e je pari a chê de gnot (D’Atom e di Març, la gnot e il dì si spart) e e va indevant la sô jevade tal cîl dal emisferi boreâl. Cussì la nature e ven compenetrade de ansie e de sbisie de mutazion, la gnove energjie dal vintri soterani de tiere e salte fûr e e savolte i minerâi, la vite vegjetâl e animâl, puartant il mudament ancje te meteorologjie. Moviment e perturbazions atmosferichis a segnin il passaç de stagjon frede a chê cjalde. Dopo i pussibii sglavins dal ecuinozi, il clime al tache a jessi plui clip cun zornadis turchinis e soregladis. La nature si svee dal lunc sium dal Invier, la prime jerbe e mostre çufs su lis clevis e su lis batudis e i animâi si disvein dal letarc. E scomence la dolce e clare Vierte.
VORIS DAL CICLI AGRARI
Si stan par vierzi lis voris de gnove anade agrarie, che par tradizion si inviin cu la fieste di fonde di S. Josef (19-III). Tai curtîi, tai batûts, tes stalis si à un davoi e un va e ven di personis e di animâi, si prontin i cjars, i imprescj pes gnovis oparis dal cicli agrari. Tai zardins si finissin lis cuinçaduris e lis coltadis, a vegnin regolâts i tapêts di jerbe, plantâts pomârs e lis plantis a vegnin tratadis cuintri i parasits. Tal ort lis feminis a metin lis plantutis za semenadis sot veri o in lûc parât e a proviodin di semenâ savôrs, lidric, puar, verze e cauliflôr, cocis, cucins, vuinis, fasûi, nanui, cudumars, basili, angurie, melons e tal vieri di lune a plantin patatis, cren, ai e cevolis. A intervegnin cuintri lis mufis, lis jerbatis e i cais. Inte cjanive al va indevant il control dai vins e in chest mês si fâs l’imbutiliament dal vin gnûf cu la grande netade des butiliis e di ducj i imprescj e dai furniments di pueste. ❚
Mario Martinis