EDITORIÂL – Il carûl dal centralisim tes riformis regjonâls

✽✽ O ai domandât a un gno amì, primari di ospedâl, ce che al pensave de gnove riforme sanitarie regjonâl. Mi a rispuindût che, par lui, prime di fâ sù la cjase si scuen tirâ sù lis fondis: tal setôr a jerin soredut i colegaments e la informatiche i anei debii dal sisteme. Se a restavin tant che cumò, la riforme no coventave a nuie.
✽✽ Po dopo, o ai cjatât un altri gno amì, sindic di un comun furlan. I ai domandât ce che i someave de riforme dai ents locâi de bande de Regjon. Mi à contât che e jere une robe tant pôc clare: sedi lui che i siei coleghis a pensavin che al sarès stât miôr, prime, provâ a meti dongje i servizis comunâi, viodi se la robe e funzionave, e po dopo lâ indenant cun formis di agregazion teritoriâl.
✽✽ Par ultin, o ai cjatât un funzionari de Regjon, simpri gno amì, che al bruntulave cuintri la presse dai assessôrs: a van di corse cence spietâ i numars, lis provis di sisteme, ma soredut cence savê ce che si cjate sot dai numars e des cjartutis gjeografichis.
✽✽ Fâ di corse duncje, fâ viodi ai eletôrs che lis riformis a van indenant. Cheste la filosofie de Serracchiani e dal Pd.
✽✽ Che cheste politiche e stedi puartant a sdrumâ il Friûl in non di une false modernizazion no i interesse ae politiche. L’impuartant al è fâ viodi che si fâs alc.
Di ben altre nature a son, al contrari, lis vicendis leadis ae economie, aes struturis.
Chê altre dì, par esempli, daspò dai industriâi, ancje lis Cjamaris di Cumierç di Gurize e Triest si son unificadis. Si clamaran de Vignesie Julie. E cussì, e nancje plui planc planc, si sglonfe di contignûts pardabon reâi chê che prime e jere dome une espression teoriche e ancje falade.
✽✽ Al è di bant che in comission ducj, mancul cualchi basoâl, a disin di “sì” par celebrâ uficialmentri la zornade dai 3 di Avrîl, tant che cheste e somee plui un “bombon” storiografic che pluitost un ricognossiment di une realtât che e vîf ancjemò tal mont di vuê.
✽✽ Di agns a cirin di dineâ la esistence dal Friûl sedi gjeografic, sedi antropologjic e sociâl. A rosein la sô imagjin di unitât a plui nivei: a esaltin lis variants de lenghe par dimostrâ che a Pordenon no son furlans e che i bisiacs a son dute une altre robe. No cjacarìn po dopo dai cjargnei e vie indenant.
✽✽ Ce brâfs! A rivin a doprâ une ricjece di lengaç cuintri chei che lu fevelin.
Al è un carûl che al lavore ancje tal cjâf de int, un virus pandût ator di gjornâi e televisions, dulà che in dutis lis comunicazions e à di passâ la idee di une realtât uniche, di une mignestre cence savôrs che si clame “Regione Friuli Venezia Giulia”. E lu scrîf par talian, par che al sedi clâr che cheste e je la dizion juste dal mâl.
✽✽ O volarès che dutis lis voltis che un dai sorestants al fevele di Friûl, cualchidun dal public i domandàs cuâl che al sarès par lui il Friûl.
Che, visaitsi ben, nol è dome “dulà che si fevele furlan”, ma une tiere cui siei confins, un popul cu la sô storie e il so dirit a continuâle. ❚
Dree Valcic