AL CINE CUN BETE. Cjars

Strade costiere di Miramare. Une Ferrari, cuntune saete dissegnade parsore dal music, e file vie pivetant e sorpassant a drete e a çampe dutis chês altris machinis che a passin pe stesse strade.
La Ferrari e à ancje un non: si clame Folco.
Come dutis lis machinis che a vivin di chês bandis li, Folco al passe il timp a Barcola al Fritolin (a disin che il pes lu fridin cul stes vueli che a doprin tal motôr), o pûr a comprâ monadis par jessi simpri il plui ae mode des corsis: spoilers, aletons e argagns cussì, che no coventin a nuie.
Une dì, Folco al sta zuiant a passâ di ca e di là des sinis dal “Tram de Opcina”, cuant che une machine lu passe a drete. Folco, che nol rive a sopuartâ di jessi passât, al scomence a corii daûr, ma si piert vie pes campagnis, fin che al rive intune citât: Blave City.
A Blave City a vivin doi tratôrs, cuatri cjars e une bielissime trebie. Folco al rive, ju cjale di stuart (“Ce contadins!”, al pense) e al domande subit dulà che al pues cjatâ un lûc par rilassâsi dopo dute la strade fate: une SPA, un estetist che i fasi la pneumaticure, un mecanic che i meti il vueli gnûf, magari biologjic e profumât.
I tratôrs e i cjars lu cjalin cun doi ferâi cussì: ce disial chel li? Estetist? Spa? Chi si lavore!
(Come che o varês capît, Folco al jere finît in “Furlanie”).
“Al massim, dopo vore, tu puedis vignî tal bar cun noaltris a bevi un spritz. Ven a trebiâ e dopo o viodìn”.
(Il spritz, a Blave City, al è Gasoli cul Tocai)
“Trebiâ? Jo? Ma savêso cui che o soi, jo? Jo a Triest o ai vinçût dutis lis corsis di rive jù di San Giusto! Savêso che o soi bon di passâ il bivio ad H come se al fos un bivio a &? E dopo, o ai a pene lustrât i cerclis, no pues mighe sporcjâju di pantan! Vêso invezit un puest dongje de aghe dulà cjapâ soreli? Un puest tant che Barcola, cuntun pôc di ciment?”
“Boh, o vin il Tiliment. Cui claps”.
E cussì, Folco al va a cjapâ soreli tal Tiliment e dopo al va a bevi il spritz cui cjars, i tratôrs e la trebie. E, forsit par vie dal aiar cjapât tal Tiliment, forsit pal spritz (il cingolât che al jere daûr dal bancon i veve zontade ancje un pocje di sgnape di cuvierton, dentri), forsit pe biele caroçarie de trebie che intant che e beveve i striçave lis lûs, ma Folco al à scomençât a inacuarzisi che la sô vite no i plaseve plui tant.
E, leint il so libret, al discuvierç che il so non nol è Folco, ma Folc (par vie de saete dissegnade sul music) e che sô mari e jere une “Ape” che e vignive de Cjargne.
Cussì, Folc al mole Barcola, il Fritolin e il “tram de Opcina”, si gjave i cerclis in leghe e si met sù un biel ganç di rimorchi par tirâ la vuarzine, si maride cu la trebie e di chê dì al vîf furlan e content dongje dal Tiliment. ❚
Bete di Spere