LA VÔS DE CISL. La declarazion di sucession

La sucession e je il strument che al permet ai erêts dal defont (il “de cuius”) di sotentrâ a di chel inte disponibilitât di ce che al à possedût in vite.
La date dal decès e je la date di “viertidure de sucession”, o sedi il trasferiment dai bens (imobils e/o mobii) dal defont ai erêts.
La declarazion di sucession e va presentade dentri di un an de date di viertidure.
Par une compilazion corete i erêts a àn di:
– racuei la documentazion su ducj i bens (atîf ereditari) li che il “de cuius” al veve un dirit reâl (proprietât, usufrut, e v.i.), sedi imobils (fabricâts e terens) che mobii (conts corints, fonts, librets, azions, zoiis, e v.i.);
– documentâ ancje i debits dal defont (passîf ereditari);
– costruî l’“arbul gjenealogjic” dal “de cuius”par identificâ i erêts legjitims su la base dal grât di parintât (si pues rivâ fin al sest grât di parintât), che di là di chel i bens a vegnin destinâts al Stât.
E va verificade la presince di un testament che al disponi volontâts particolârs dal “de cuius”.
Il testament al pues jessi olograf (scrit di propri pugn) o public (scrit in presince di un nodâr e di doi testemonis che no sedin parincj).
In ducj i doi i câs, il testament par jessi bon al va fat publicâ di un nodâr de bande dai erêts e zontât ae declarazion di sucession.
Un erêt al pues decidi in libertât se acetâ une ereditât o se rinunziâ. La rinunzie e va fate li di un nodâr o dal cancelîr dal Tribunâl dal lûc dulà che e je vierte la sucession.
La acetazion de ereditât e pues jessi manifestade invezit in forme “esprimude”, “cidine” o “cun benefici di inventari”.
La acetazion esprimude e pues jessi contignude intun document (declarazion) o ancje dome definintsi “erêt” intai ats aministratîfs come la declarazion di sucession. La acetazion no pues jessi sometude a cundizion o jessi parziâl. Se le manifesti, e sarà par simpri e no si podarà rinunziâ.
La acetazion cidine e je cuant che il sogjet al compìs un at che al presupon par necessitât la volontât di acetâ (par esempli dâ procure a un tierç pe vendite di un ben ereditari).
La acetazion cun benefici di inventari e manten separât il patrimoni dal defont dal patrimoni dal erêt, che duncje al rispuindarà dai debits dal defont dome intai limits dal atîf ereditari. Chest gjenar di acetazion e je obligatorie cuant che l’erêt al è un minôr o un interdet (e je dibisugne di une autorizazion a pueste dal Judiç tutelâr).
A son esentâts de presentazion de declarazion di sucession il coniugât, i fîs, i gjenitôrs e chei altris parincj in linie drete cuant che l’as ereditari nol passe € 25.823,00 e nol cjape dentri bens imobii.
La impueste di sucession e previôt trê alicuotis (e sfrancjaments relatîfs) daûr i grâts di parintât dai erêts:
• coniugât e parincj in linie drete (par esempli fîs, gjenitôrs): 4%, sfrancjament fin a un milion di euros di valôr de ereditât;
• fradis e sûrs, 6%, cun sfrancjament di 100 mil euros;
• altris parincj fin al cuart grât, afins in linie drete (missêrs), afins in linie colaterâl (cugnâts) fin al tierç grât: 6% cence sfrancjament;
• ducj chei altris sogjets, 8% cence sfrancjament.
La sucession di bens imobii (fabricâts e terens) e je dut câs subiete aes impuestis ipotecarie e catasticâl. ❚
✒ Marianninna Rocco, Responsabile Fiscâl CAF CISL Udin