Il Diari al bandone la cjarte e al cres sul web

Il cuindisinâl in lenghe furlane “Il Diari” al è stât par nûf agns il sfuei in lenghe furlane de cussì clamade stampe a gratis (free press). Un gjornâl biel di lei, che al informave e che al rivave, in maniere passive, a fâ capî ai furlanofons, e no dome, che cu la nestre lenghe e i nestris cjâfs o podìn resonâ di ogni teme. Si lu cjatave tai ambients comerciâi, tai dispensadôrs par dut il Friûl, o intes ediculis di gjornâi al presit simbolic di vincj centesims, ma no dome. Di cualchi setemane al à cressude la sô fuarce su la Rêt simpri ae direzion www.ildiari.eu, cuntun sît che par agns al à coventât plui che altri par fânus discjamâ i ultins numars de edizion su cjarte in formât PDF. Cumò invezit al è cambiât, presentant une cerce di gnovis e articui di aprofondiment sei su la pagjine principâl sei intes tantis sezions che, par indreçâ il visitadôr, si cjatin ad alt. Te sezion “Cuviertine” si cjatin i articui des primis pagjinis di ogni numar; un puest fondamentâl i spiete ae sezion “Universitât”, che e je dedicade al ateneu furlan e ae ricercje. Te sezion “In paîs” a son lis gnovis dai paîs furlans, po dopo si cjatin lis sezions Lavôr e Sport. Il spazi de Culture si spartìs ancje in dôs rubrichis: une su lis contis e une pes recensions di libris. Te sezion Archivi, che al sarès biel rivâ a slargjâle, a son documents une vore interessants su personaçs, toponomastiche e altris temis. Il sît al è une vore sut e si cognòs che al è fat in economie, come che al è normâl stant la situazion vergognose dai contribûts pe culture furlane, par esempli si viodin ca e là scritis par spagnûl. Un difiet al è il fat che i articui no àn un codiç di pueste e duncje nol è pussibil che a sedin “linkâts”: une sielte che e limite une vore la difusion dai contignûts su la rêt des rêts. La linfe des pagjinis a son i articui, che a son suts, curts, sul pont e, come che al è il stîl di chescj gjornâi, a doprin un lengaç ferbint, svelt e vivarôs. Al è un pecjât che chest gjornâl nol vedi une presince plui “nobile” su la Rêt, ma chest al è il spieli de situazion grivie e de pocje stime che la politiche regjonâl di îr e di vuê e à pe comunitât furlane. Ise une colpe dai furlans, chê di rivâ a fâ tant cui fruçons? ❚
✒ Michele Calligaris