Mara Beorchia, Sindic dal comun di Davâr

In chestis ultimis elezions aministrativis, a son stadis eletis feminis ae incarghe di sindic in trê Comuns de Cjargne: a Davâr, Rigulât e For di Avoltri.
Une volte, tes cjasis cjargnelis la femine e jere une presince fondamentâl, e veve di tignî in pîts i cuatri cjantons de cjase. Cumò i timps a son cambiâts, la femine e à cjapât impuartance ancje fûr dai mûrs di cjase: tal lavôr, te societât, te politiche, ancje se cun tantis dificoltâts.
“Forsit, lis feminis a son viodudis in maniere no convinte di bande dai oms tal ambient politic – nus dîs Mara Beorchia, sindic dal comun di Davâr -. Lu viôt cuant che ti cjalin cuasi cun maravee tal moment che tu ur dîs alc di impuartant e di seri. Al dipent un pôc ancje dal caratar di ogni femine di cjatâ la maniere miôr par rivâ a vê chê fiducie che i meretìn. Mi plâs puartâ l’esempli di mê none: femine fuarte, e à lavorât tant cun grant spirt di solidarietât e mi à lassât un grant esempli di vite, di tignî presint in ogni situazion. O crôt che la figure feminîl storiche des feminis de Cjargne e sedi un clâr messaç di fuarce e di coraç par dutis nô.
Jessi sindic intun piçul comun de Cjargne al è come jessi un pari di famee che al cognòs ducj i siei fîs e al vûl par lôr un doman seren, fat di lavôr e di sigurecis. Il paragon al è clâr e al da subit la idee des preocupazions di un sindic, che ogni dì al à denant di se la realtât dai problemis economics, de mancjance di lavôr par tancj siei citadins, dal dispopolament dal so teritori e dal invecjament de popolazion. E je une bataie ogni dì, a voltis e devente un berli di aiût te sperance che finalmentri si cjatin soluzions ancje par cheste tiere. Achì o vin tant: un paisaç stupent, un tiessût culturâl e sociâl di preservâ par salvâ un contest che al podarès dâ une buine cualitât di vite. O vin di motivâ i zovins a no lassâ i nestris paîs, pluitost a cjapâ in man il nestri doman par tornâlu a fâ sù, cun tante buine volontât. Chest al è ancje il motîf che mi à sburtât a candidâmi a sindic dopo une esperience precedent tant che assessore.
Viodint il presint, no soi tant otimiste. O volarès jessi insiemi a chei altris aministradôrs tal scomençâ un percors di mudament. Al è impuartant convinci la int che o vin di jessi unîts e lavorâ ducj par un unic obietîf: creâ il contest economic e sociâl par fâ restâ achì lis fameis che a vivin tai nestri paisuts. Chest al vûl dî mantignî il lavôr e creâ altris pussibilitâts di disvilup dal teritori, leadis al turisim e al ambient. O vin za dut ce che nus covente: e mancje dome la convinzion di bande di ducj e un jutori smirât, concret e coordenât de politiche. Ae politiche o domandi plui atenzion, che nol vûl dî dome stanziâ fonts pe mont ma prin di dut mostrâ interès a capî cemût che si vîf vuê in mont e cualis che a son lis nestris dificoltâts. O vin dome di recuperâ il spirt di intraprendence che nus à simpri onorât denant di altris realtâts: al baste pensâ a cemût che il nestri popul al à reagjît aes grandis calamitâts de storie, come la vuere o il taramot. No stin vivint dramis come chei, ma o crôt che o vedin di recuperâ istès la stesse fuarce di chei timps, par saltâ fûr di chest moment.”
Al pâr di capî in chestis pocjis riis che la grinte e la voie di fâ no mancjin al sindic di Davâr, che cul spirt des feminis cjargnelis di une volte e à decidût di puartâ indevant il so compit impuartant. ❚
✒ Marta Vezzi