Darte, la impantanade

Vêso presint chês machinis cjoltis gnovis di steche, forsit cuntun tic di premure di masse, cence badâ ae cualitât al optional par brie di metile subit in strade? Machine dal sigûr cuntun motôr lusint ma cun chel difietut di fabricazion che ti fâs simpri danâ. Bon, pensait cumò a cheste machine che e finìs plan plan tal pantan, e frache che ti frache il pedâl dal aceleradôr, no si rive mai a fâle saltâ fûr dal dut di cheste poce. Cemût mai chest pinsîr? Parcè che forsit al è il plui azecât par contâ la Darte in dì di vuè. Une des storichis localitâts turistichis di dut il Friûl-VJ e  di cheste bande de Italie di un pâr di agns e à pierdût il so incjant, il so riclam e pûr vint provât a sburtâ in plui direzions e continue a barbotâ e a çuetâ.
In principi dai agns 2000 a son partîts diviers cantîrs pe sistemazione e l’ampliament di chel che al è simpri stât e simpri al sarà il cûr dal paîs, sei a dî il stabiliment termâl e la famose “Aghe pudie”, cognossude za dai timps dai Romans.
Investiments pesants, diviers milions di euros, rivâts in grande part de Union Europeane che a àn permetût di sistemâ – cun grandissime fadie pai diviers problemis intassâts un sore chel altri – pissinis, centri di benstâ, locâi pes riabilitazions e si spere, dentri de fin dal an, di rivâ a completâ il “Palaç des Aghis” cui bagns turcs, saunis e zone relax. Dal 2013 po dopo si è rivâts ancje a comedâ il discors de gestion dal stabiliment, che e à cambiât une maree di gjestôrs cu la conseguence di no podê programâ cun creance ativitâts e promozion.
No dome lis termis a àn caraterizât la trasformazion dal paîs di Carducci, e il riferiment al va al maiestôs implant di teleriscjaldament costruît abàs dal paîs, un dai plui grancj de Regjon e pensât par brusâ sterps e scarts de lavorazion dal len che a coventin a produsi energjie termiche a servizi dal riscjaldament di albiercs, cjasis e edificis publics di Darte. Ancje chi come pal discors des Termis, idee utile e biele ma forsit mâl calibrade, tant che dome chest an, simpri a fadie, si è rivâts a fâlu funzionâ come Dio comande.
No stin a dismenteasi dal gloriôs Hotel Savoia, ristruturât in lunc e in larc par fâlu diventâ il “top” de Cjargne e invezit si sta incjemò cirint une anime pie che lu cjapi in gestion.
Viodêso duncje che cheste machine lis à provadis dutis par rivâ a stâi daûr a localitâs turistichis di prime fasse, come chês dal Trentin o dal Tirôl dal Sud. Ce che al mancje però, e lu vin za dit e scrit chi su la Patrie un pâr di mês indaûr, al è il mani. Sei a dî la politiche turistiche pal teritori e i oms che a stan daûr di cheste. Un resonament che al vâl par dute la mont da Regjon e no dome.
Cemût mai si domandin ducj, che a Vilac si fas la code par jentrâ tes termis di Warmbad? Cemût mai che di là dal Pas di Mont di Crôs si fâs la code par jentrâ tal Aquarena di Kotchack-Mauthen?
E cemût mai che aes termis di Darte no si rive a imbrocjâ i stes numars?
Forsit parce che no si rive a percepî par timp che la ofierte di cui che al cîr il relax, lis curis termâls, il bonstâ si è une vore modificade tai ultims agns e al tocje cori un grum e vê un grum di fantasie par stâ daûr a chestis esigjenzis. No podìn insome pensâ di continuâ a stâ in pîts cu la copiute di pensionâts che a rivin sù a fâsi une, dos o trê setemanis di vacance e vonde, o pûr cul Udin che al ven in ritîr dôs setemanis. Dal sigûr ancje lôr a fasin ben e a puartin bêçs, guai a spudâi sore. Ma ce che si vûl dî al è che a coventin numars, competizion, imagjinazion.
Par esempi une bielissime iniziative screade l’an passât a Darte – e che si ripetarà ancje chest Istât – e je chê dal “Soggiorno dei Poeti”, ven a dî la aministrazion comunâl, in acuardi cui albergadôrs, e à decidût di invidâ atôrs, scritôrs, musiciscj, poetis, artiscj emergjents di dute Italie che si esibissin pal public a gratis, vint indaûr la ospitalitât complete. Altre biele idee e je chê di un pâr di ristoradôrs che a àn pensât di lanciâ rapuarts di scambi gastronomics cu la Emilie, tal segn simpri di Giosuè Carducci. Po dopo altre novitât lis Setemanis a Cjaval, promovudis li dal Randis Ranch pai frututs, dulà che si ur insegne a stâ su la bestrie ma ancje a vivi ta nature. Bogns propuesits a ‘nd è, e mancje cumò une buine sgasade. ❚
David Zanirato