La viticulture romane in Friûl

La ultime campagne di ricercjis fate de Societât Furlane di Archeologjie tal comun di Murùs, concentrade te pars rustica di un complès residenziâl di ete romane in localitât Muris, e à puartât a une scuvierte straordenarie: une etichete di plomp dal 106 d. d. C., rote in doi tocs, cu la scrite: Commodo et Ceriali / co (n) s (ulibus) vitis / Set [i] na, o ben “sot dal consolât di Commodo e Ceriale, vît di Sezze”.
La vît e vignive des campagnis di Setia (Sezze – LT) tal Agro Pontino, dulà che si produseve il Setinum, un dai vins plui famôs, celebrât tra il I e II sec. d. d. C. di Plinio il Vecjo, Marziale e Giovenale. Duncje, te ete di Traian, cualchidun al cjolè la vît tal Lazio pal so inseriment in teritori culinâr. La scuvierte de etichete e à inmò plui significât se si pense a un edit famôs di Domizian (dal 92, daûr di ce che al dîs Eusebio di Cesarea), che secont Svetonio al vietave di implantâ (novellare) gnovis vîts in Italie e al comandave di gjavâ fûr metât di chês che a esistevin tes provinciis. Di une letare di Plinio il Zovin, scrite tor dal 107, o savìn daspò che il senât al veve predisponût un decret par obleâ i senatôrs provinciâi a invistî un tierç dal patrimoni in terens talians, «par vie che Rome e la Italie no jerin stale di forescj contents, ma patrie di Romans». No podìn dî dal sigûr che la aree di Murùs e sedi stade un invistiment di bande di un senatôr provinciâl, ma la etichete di plomp e conferme un “tornâ ae agriculture” te ete di Traian, un invistiment in coltivazions preseadis, come che daspò al varès fat tal XVIII secul Fabio Asquini cu lis sôs vîts a Feagne e lis esportazions dal preziôs Picolit. Il sgjâf al à mostrât la presince, fint al I sec. p. d. C., di un grant complès agricul. A son vignûts fûr ancje cuatri scheletris di bovins, soterâts cuant che l’insediament aromai no si doprave plui, forsit tor la fin dal IV e inizi V secul. I rescj a son daûr dal esam dal DNA, prontâts de équipe di Paolo Ajmone Marsan e Licia Colli de Universitât Catoliche di Piacenza in colaborazion cu la équipe di Raffaele Testolin dal Istitût di Gjenomiche aplicade de Universitât dal Friûl, che si ocupe dal gjenome de vît e che al à in vore un confront tra lis vîts dal Friûl di vuê e chês de moderne Sezze. ❚
Maurizio Buora, Societât Furlane di Archeologjie