VIERS IL FRIÛL. Biel e brut tai risultâts des aministrativis

Lûs e scûrs des elezions aministrativis intai comuns fûr Regjon che a sburtin par tornâ in Friûl. Di fat, dal vôt dai 25 di Mai a son rivadis gnovis positivis par esempli di Cint, dulà che al à vinçût Gianluca Falcomer, 30 agns, furlanist doc, cjâf grup di minorance te precedente legjislature, in prime linie di simpri pal passaç dal mandament di Puart viers il Friûl midiant dal moviment “Dai monti al mare”. Une vitorie nete, cul 63,13%, che in campagne eletorâl e jere stade precedude dal anunzi dal dipuesit ae Cjamare dai Deputâts de propueste di leç pal cambi di Regjon, fate dai deputâts Giorgio Zanin di Sant Vît al Tiliment e di Sara Moretto di Puart. No i è lade drete invezit a Alessandro Mauro, che si jere candidât sindic a Sapade-Plodn. Il puartevôs dal Comitât par tornâ in provincie di Udin al à pierdût cuintri l’assessôr jessint Manuel Piller Hoffer. Cun grande onestât inteletuâl si è cjapât la responsabilitât de sconfite, ma al à ancje zontât che al continuarà a impegnâsi pal obietîf di puartâ Sapade in Friûl. Mauro si spietave che tal paîs e fos plui sintude la esigjence di un cambiament un grum radicâl e che chest cambiament al podès saltâ fûr dome cul passaç di regjon. In fin, al à dut câs rimarcât che il lavôr fat al continuarà, sedi a nivel locâl sedi cui interlocutôrs nazionâi. Ancje se al è di dî che cu la senatore De Monte, svolade a Bruxelles, a Rome al sarà plui complicât smovi lis aghis par rivâ a fâ aprovâ la leç. L’ultin dât interessant che al rive simpri dal Belumat al è che aes elezions europeanis la SVP e à tocjât percentuâls in dople cifre in plui di cualchi comun. Segnâl che l’autonomisim nol è passat di mode, anzit, si fâs sintî simpri plui fuart.. ❚
Il Cjargnel