Anzians in mont, no stin a molâur la man

Un dai problemis plui grues che tai prossims agns la Mont e varà simpri di plui su pe schene al è chel dai anzians, agravât inmò plui di un dispopolament che al mangje une medie di 450 residents ad an, 2 mil e 500 tai ultins cinc. Un dât su dut che al da la idee, al è chel dal indiç de dipendence senîl: un anzian ogni trê adults, rapuart che al cres fin a un ogni doi, tai paîs plui margjinâi. Cence dismenteâsi che plui une persone e je lontane dai lûcs di cure, plui la sô salût e je a risi. E al è evident che al sisteme sociâl i tocjin un grum di rognis: la assistence prime di dut, i traspuarts, la animazion par no lassâju di bessôi. Une persone su cuatri di etât superiôr ai 75 agns e ven cjapade in caric dal servizi infermieristic domiciliâr, e cirche il 10 par cent di chel infermieristic ambulatoriâl. Sore la medie regjonâl po dopo ancje lis malatiis, sedi chês dai vues, sedi chês che a cjapin il cjâf. Di ultin, lis dificoltâts economichis: no ducj si rivin a permeti la Cjase di polse o la assistente di famee, in tancj a scuegnin meti la pension in famee par cuvierzi fîs o nevôts che a son cence lavôr. E al fâs rifleti ce che al conte il sindic di Comelians, che mai al à dit si sarès spietât di tignî in comun une risierve di aliments in scjatule dal Banc Alimentâr par chei siei paisans che no rivin a cjolisi di mangjâ.         Se in dut chest cuadri par fortune il sisteme al rêç, al va dit un grues graciis ae eficience dal servizi sociâl de Aziende sanitarie, ma ancje aes une vore di associazions dal teritori che si spindin par judâ a tignî adun i vecjos dai paîs, par no fâju restâ sierâts in cjase, par permetiur di continuâ a sintîsi part di une comunitât che mai come di chescj timps e varès bisugne di riscuvierzi valôrs di sacrifici, cooperazion, unitât. E in cheste direzion a van par esempli i servizis di traspuart tra i borcs e il centri dal paîs, utii par fâ comissions, spesis o visitis, ma ancje i centris di agregazion diurne, animazions domiciliârs o formulis gnovis di abitazions che a garantissin tal stes timp autonomie pe persone e rispuestis di assistence. Cussì come la idee di creâ une bancje de memorie par meti adun testemoneancis, documents, fotografiis, contis che se no a riscjaressin di dispierdisi.
Par dut chest al è inevitabil che a coventin bêçs, e no pôcs; inevitabil duncje che te gnove riforme dal sisteme sociosanitari regjonâl si cjati la formule juste par liberâ fonts taiant straçariis, lant duncje a aumentâ i servizis teritoriâi, cuntun voli di rivuart pe prevenzion des malatiis e des dipendencis, soredut alcul e zûc di azart, che simpri di plui si stan dimostrant conseguencis de emargjinazion. ❚
David Zanirato