Sfuei Mensîl Furlan Indipendent
Archivi de Patrie

AL CINE CUN BETE. EF L’extra furlan

Bete di Spere

An 1982. Une famee di furlans e vâ a fâ une gjite sul Cjars. Fat il pic nic, il pari si nacuarç che al è tart e che al à di lâ a bagnâ i cjamps a cjase: a son stâts li a gjoldi par tre oris, cumò e je ore di lavorâ! Cussì dute la famee e torne in Friûl, ma te presse a dismentein tai baraçs il frut, di dîs agns.
Chê sere, Elliott, un altri frut che al viveve di chês bandis li, lu viôt: il frut furlan al stave cjapant sù pomulis par mangjâ e, bielzà che al jere li, si veve metût ancje a cerpî i baraçs.
Elliott al torne a cjase e al conte a sô mari e so pari ce che al à viodût, ma nissun lu crôt:
“Ma coss che te disi? Un che lavora? Nel Carso? Ma che monade me conti, ciò?”*
(*il film al à i sottitui: “Un che al lavore? Sul Cjars? Ma no stâ a dî monadis!”.)
Alore, par tirâ dongje la creature misteriose, Elliott al semene ator pal bosc martiei, clauts, menevîts e altris imprescj di vore, fasint un troi che al rive fin a cjase sô.
Il frut furlan nol rive a resisti ai imprescjs di vore, e al rive a cjase dal triestin.
La matine, la mari e il pari di Elliott lu cjatin che al comede il lavandin, e alore a capissin che Elliott le veve contade juste: la creature misteriose cun tante voie di lavorâ e esist pardabon! No savint cemût che al fâs di non, a decidin di clamâlu E.F, l’Extra Furlan.
E.F. e Elliott si cjapin ben, ma come ducj chei che a vegnin di monts cussì distants, no rivin a comunicâ. E.F. al domande un neri e Elliott i puarte un cafè, e ogni volte che E.F. al prove a fai fâ alc, Elliott al rispuint “No se pol”, o “No go voia”.
Intant, i sienziâts dal Sincrotrone a scomençin a dâ la cjace a E.F., par studiâ une creature tant strambe.
Elliott però i vûl ben a E.F. e par protezilu lu mascare di triestin, cun vistîts firmâts e une creme scure, par fâl someâ che al vedi cjapât soreli. Ma E.F. al scomençe a stâ mâl: planc planc i stâ vignint fûr une fuarte alergjie pal fâ nuie: nol pues propite fermâsi a Triest.
Elliott i domande: “Te vol far una telefonada a casa?”
Ma a cjase di E.F. nol rispuint nissun: a son ducj a vore.
Cussì E.F. al fâs sù une biciclete cun ce che al cjate tal garage di Elliott e al partìs, saludant Elliott pe ultime volte, e lassant un grant insegnament: cuant che tu âs un lavôr di fâ, clame un furlan. ❚
Bete di Spere

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +