IL GRANT LUNARI DAL FRIÛL. Jugn

Jugn al è il sest mês dal an e cussì la grande ruede dal timp che al va daûr dal moviment dal soreli tal arc celest e dal calendari de nature e je rivade ae metât dal so percors. Il non dal mês al podarès riferîsi a Juno, Junon, divinitât de lûs e femine-sûr di Jupiter, o ben ai juniores, i zovins (e cussì, come che si è viodût, oponût al maius, mês dai majores), o ben ancjemò a Iunius Brutus, prin consul roman dopo de espulsion di Tarquini il Supierp, o ae iunctio, vâl a dî la coniunzion jenfri il popul roman e chel sabin.
In chest mês i paisaçs a ufrissin un spetacul di dute plenece, tocjant la nature il pont di colme dal plui grant svilup in linee cul moviment dal soreli tal cîl di Setentrion, che cul solstizi di Istât al rive ae sô massime inclinazion positive (+23°27′), slargjant su lis coltivazions la sô energjie massime, ingruessant cussì lis pomis e madurint il forment. Ancje i prâts plui bandonâts a deventin zardins florîts e profumâts; a sflorissin i zîs e lis calis parmìs dai fossâi, iris e spadis tai zardins; sui cancei e sui sierais des cjasis vecjis di clap si rimpinin i rosârs profumâts e lis vecjiis viis dentri dai curtii a tegnin il fresc cun pergolâts fis.
Chês di Jugn a son lis zornadis plui lungjis dal an, cuant che si pues lavorâ fin a sere tarde e po intratignîsi fûr di cjase, une volte cu la int dal borc, in dì di vuê tai bar e tai lûcs di divertiment. Lis gnots a son curtis, claris e dolcis tant di no indusi a tornâ. Tancj a partissin pe vacance, li che a cjataran il mâr e la mont plui biei, cence la grande sdrume di int che e fasarà segnâ i mês plui cjalts de Istât. In Jugn, mês dal solstizi, de seseladure dal forment e de vignude dal prin cjalt, si rinovin lis tradizions liturgjichis e lis usancis popolârs di tancj sants impuartants dal calendari come S. Florean, S. Antoni, S. Vît, S. Zuan e S. Pieri, che lis lôr fiestis a jerin tant seguidis tes localitâts li che chescj a jerin titolârs di plêfs di glesiis o di capelis, e che lis lôr datis a jerin impuartants scjadençaris tal lunari rurâl des ativitâts dal cicli agrari. Par chest motîf chestis fiestis a jerin une vore infolcjadis di int e dopo vê puartât fin insom lis pratichis religjosis si tignive la fieste popolâr. Finint la Vierte e tacant l’Istât il mês di Jugn al cjape cetant il coltivadôr e la sô famee interie, che tal moment di colme dal lavôr (ort, vigne e cjamps) par vieri a vevin di zovâsi dal scambi di prestazion cun altris lavoradôrs e fameis. Cumò plui che mai a preocupin lis cundizions dal timp che di un moment a chel altris cun burlaçs, tempieste o sut al podarès ruvinâ la interie anade agrarie o lis grandis voris dal mês, come la racuelte dal forment o la batidure, il prin tai de jerbe e dal foraç, i trataments cuintri il negron tai vignâi, il control de fermentazion dal vin che al sint il prin cjalt te cjanive. ❚
✒ Mario Martinis