IL FERÂL. I furlans e il templi

O scomencìn chest gnûf an dal “Ferâl”, la rubriche dedicade a pre Antoni Beline, riproponint une sô riflession a pontadis. Il test complet al à il titul “I Furlans e il templi” e al presente un resonament sul rapuart dai Furlans cu la fede e la religjositât.
(seconde pontade)
[…]
***
1.    IL TEMPLI
Cuant che o feveli dal templi, o feveli in pratiche di gran part o di dut ce che al rivuarde la vite e la struture de nestre religjon catoliche.
Glesie materiâl
O feveli prin di dut dal templi come glesie di clap, usance il templi di Salomon. Dopo di vê fate sù la cjase di Diu framieç dai oms, là che al veve spindût e spandût cence culumie di materiâl e di art, lui stes si domandave: “Ma Diu staràial pardabon cui oms su la tiere? Ve che i cîi e i cîi dai cîi no rivin a tignîlu; ancjemò mancul cheste cjase che jo o ài fate” (1 Re 8,27). Domande che no à pierdût par nuie di atualitât e di problematicitât.
O feveli duncje des glesiis di ogni ete e fate là che storicamentri e concretamentri ancje i Furlans si son cjatâts par secui a cjantâ lis laudis dal Signôr, a celebrâ i siei misteris, a scoltâ ce che i predis cun plui o mancul fedeltât e libertât ur insegnavin, a vivi i moments fondants de lôr vite: la nassite, la cressite, la maturitât e la muart, cun dute la schirie dai sacraments tradizionâi. Cuant che o fasevi scuele a la canae di Treli e ur disevi di fâmi un disen, no mancjave mai la glesie in prin plan o tal cûr dal paîs. Tai disens dai fruts di vuê, se ur vanze timp fra une navigazion in internet e un zûc cul computer, vegnie fûr ancjemò une glesie? E je passade pôc plui di une gjenerazion ma a podaressin jessi passâts ancje mil agns, di tant diferente che e je la robe.
Implant dutrinâl
Cu la peraule templi o intint ancje dut chel implant dutrinâl, dogmatic e morâl o moralistic, che in tancj secui e in tantis predicjis e dutrinis i predis a àn cirût di fânus jentrâ tal cjâf cun sistemis no simpri a l’altece de situazion e tal rispiet di un tesaur cussì grant. Cence dâ un judizi morâl ma dome restant a la rude analisi dai fats, tocje dî che la stragrande maiorance, fale cualchi ecezion, a àn batût plui su cualchi comandament che su altris, a àn cirût plui di spaventânus cui cjastics che di ingolosînus cui premis, a àn vût un voli di rivuart plui pai siôrs esponûts a tantis tentazions che pai puars simpri impenitents. “Mi varès plasût che i predis a vessin spaventât i siôrs che a mertavin come che a àn spaventât i puars che no mertavin” al à dit pre Checo. E pre Laurinç Milani al à scrit che “nol è onôr insegnâ l’ubidience e la sotanance a di chei che a son za ubidients e sotans”. Al mertarès propit un studi sistematic sul stamp di predicazion dai nestris plevans e sui argoments plui batûts dal magjisteri sacerdotâl e episcopâl.
[…] ❚
(al va indevant sul prossim numar)
pre Antoni Beline