GLESIE FURLANE: 40 agns di impegn pe lenghe e culture furlane

(seconde pontade)
[…]
***
Un piçul struc storic
Ducj sa ormai che il Cristianesim al è rivât une vore adore te citât di Aquilee. La Glesie culì e à savût dâsi daurman une sô forme organizative, e à savût svilupâ une sô teologjie e une sô liturgjie. La Buine gnove dal vanzeli le à sparniçade tal grant teritori de sô metropolie. Dongje dai siei messâi e veve elaborât ancje un so cjant liturgjic. Tant che Cromazi al disè: “Et Romae nos dedimus cantos”. E di Jeroni o vin la famose testemoneance: “Aquileienses clerici quasi chorus beatorum habentur”. Partant e jere une Glesie siore di une sô traditio cun elements e sensibilitât di provenience plui orientâl che romane: “Alexandrinae Ecclesiae semper dispositionem ordinemque tenuerimus et juxta morem consuetudinemque maiorum, eiusque communionem indissolubili societate ad haec usque tempora servemus” [=Nô o vin simpri mantignût la regule e l’ordenament de Glesie alessandrine e, daûr l’usance e la tradizion dai nestris paris, o tignìn cun jê un leam strent fin al dì di vuê] (Cromazi Letare XII P.L. 16, coll. 947-949 scrite tal contest dal concili di Aquilee dal 381).
Ma no podìn dismenteâ ancje la nassite dal Patriarcjât cu la sô grande jurisdizion, il Schisme dai Trê Cjapitui, l’organizazion plebanâl des comunitâts, il Stât patriarcjâl, il cjant patriarcjìn, la lenghe dal popul te catechesi e tes omeliis. Elements che a àn dade une identitât a la Glesie aquileiese-furlane. Ancje se cualchi element al colà tal timp, altris invezit ju ài vivûts ancje jo. Chest al vûl dî che, in forme palese o plui velade, a àn resistût fin al dì di vuê. E se il timp al plate, però nol scancele, nol gjave de memorie e dal profont. Un pôc come lis pituris di cjalcine che a àn taponât par secui i tesaurs di art des nestris gleseutis, ma cumò, gjavade la cjalcine, a son tornâts a vignî fûr e a son un spetacul.
O crôt che Glesie Furlane a sedi nassude in chest contest, e vedi metudis lis lidrîs in chest humus.
O ài ricuardât pre Checo, ma, esternis a Glesie Furlane, si à di dâ merit ancje a pre Bepo Marchet, a mons. Biasut, a pre Gilbert Pressac, o zontarès ancje il benedetin pari Pelegrin Ernetti. No pues no ricuardâ un grant cjâr amì pre Antoni Beline, esponent di ponte dal grop, e tancj altris che a àn judât tantis personis, tancj furlans a capî il probleme, a cjapâ cussience e impegnâsi.
[…] ❚
(al va indevant sul prossim numar).
pre Romano Michelotti