L’EDITORIÂL – La memorie dai erois vêrs

Di cuant che o ai passade la adolessence, molâts i zûcs e i mîts di infanzie e di zoventût, la peraule «erois» no mi plâs gran. E descrîf par solit oms celebrâts massime parcè che a àn vinçût, magnificâts dai lôr amîs vincidôrs, e dut par convinci il popul di alc. E descrîf la storie di chescj oms, che e je une storie che e passe simpri parsore de int, parsore di altris oms.
Cussì alore, o sint plui dongje la frase tant citade che Bertolt Brecht al met in bocje a Galileu tal so drame teatrâl «Vite di Galileu». Un dai students di Galileu, di non Andree, i dîs al so mestri: «Disgraciât il Paîs che nol à erois»; lui i rispuint: «No, beât il Paîs che nol à dibisugne di erois.»
Galileu tal drame le doprave in sô difese, parcè che nol fo tant eroi cuant che al abiurà lis sôs ideis par continuâ a studiâ.
RETORICHE_ La frase e je deventade innomenade e une vore citade parcè che e met sot judizi la figure dal eroi, che nol ven plui celebrât cence jessi metût in discussion. Parcè chest? Parcè che aromai o sin usâts a pensâle in maniere «postmoderne»: «Il Postmodernisim al è incredulitât pes metanarazions» al à scrit Jean-François Lyotard. Ven a stâi, che aromai cuant che un stât o cualchidun al tache a batile cuntun eroi, si tache a nasâ puce di brusât daûr. Aromai la metanarazion che al fevele Lyotard e à svuedât di plante fûr il significât nobil de peraule eroi e nus e fâs sintî dome che retoriche.
O NO RETORICHE_ Tal câs dal popul furlan, plui si va indevant a alçâ la tele de sô «storie platade», plui e cole cheste difidence. Si podìn rindi cont che achì si fevele di erois vêrs: protagoniscj di sacrificis e ats di coraç, che a àn pensât a batisi pal popul furlan e pe sô autonomie, cence domandâ nuie in cambi, par convinzion.
Par fortune, in timps modernis no je in zûc la vite come che al fo par Marc di Morùs. Ma patî l’esili, sacrificis di cariere, di promozion sociâl, chel sì. Nol conven jessi furlanist e «la int, magari cussì no, ti ven daûr cuant che e viôt che i torne cont. I prins a àn di lâ indenant par fede, par vocazion, cence pratindi nuie» (Felix Marchi).
Nol conven a viodi il presint, parcè che dopo la storie e fâs la sô justizie, ancje la storie dai popui tibiâts: e duncje di chescj «erois» nô si visìn, e o vin il dovê di fâlu ancje miôr. A chei che ur àn fat cuintri, forsit i àn intitulade une strade, ma e je une memorie frede come un cartel che prime o dopo si inrusinìs.
P.S. DI SCUSIS_ O domandìn za idealmentri scuse par chei che no vin rivât a nomenâ tal speciâl, che al è dome – come al solit – un spont par rifleti. Par fortune i oms che si son batûts pe autonomie dal Friûl a son cetancj di plui; indi è cetancj che si à di dâur inmò la lûs che a mertin, e cetancj ancjemò di scuvierzi parcè che a son stâts platâts dai parons di turni.
Dree Venier