SPECIÂL – L’indipendentist Langobart

La storie dal ultin duche langobart dal Friûl e à dal sigûr alc di epic. Rotgaut, duche di Cividât, al à finît la sô vite dutun cu la esistence di chê prime istituzion che e veve dât une identitât clare ae nestre tiere e al à finît la so vite lotant cun dutis lis sôs fuarcis cuintri di un alc che al è jentrât pardabon te storie e tal mît: l’imperi di Carli il Grant.
La fin dal ream langobart e je cognossude: tal 774 i francs, cun re Carli, clamâts dal pape, a vincin Desideri e a oblein il princip Adalgjîs (Adelchi) a lâ in esili, ospitât dai propit nemîs storics dai langobarts, tal imperi bizantin.
UN FRIÛL INDIPENDENT_ Ce che al è mancul cognossût al è che tal 774 il Friûl al reste indipendent: i francs, batûts intun prin scuintri su la Livence, no rivin a someti Rotgaut e a àn miôr di fâ un pat di fedeltât; il Friûl al jere un teritori strategjic, une vore impuartant par une espansion te Europe centriorientâl che cualchi an dopo e sarà une realtât. Cun dut achel, devant de resistence di Rotgaut e dai furlans i francs a àn miôr di lassâ chest obietîf cuiet e di sistemâ prime altris cuistions: un podê in cressite svelte come chel di Carli al veve bisugne di grande concentrazion par mantignî ecuilibris e armoniis.
UN CUNFIN CHE AL RESTARA’_ Rotgaut, par so cont, al veve lotât dome su la Livence, vâl a dî sul confin dal sol ducât e di chel che inmò in dì di vuê al è il Friûl: chest al vûl dî che no i interessave masse di lotâ in difese dal re Desideri, a Pavie, ma ben di difindi la sô tiere e la sô comunitât. Intune situazion dal gjenar, un duche oportunist e egoist nol varès vût nissun probleme a compatâ pardabon cui francs e a sometisi ae autoritât di Carli il Grant, anzit al varès mantignût lis sôs prerogativis e al varès ancje podût slargjâlis, impegnantsi in altris campagnis militârs insiemi cui francs. Ma di ce che o podìn capî dai pôcs documents che a son restâts, Rotgaut nol jere egoist e oportunist: al veve di jessi espression gloriose di chê comunitât furlane langobarde che no veve mai acetât di jessi sotane nancje dal re langobart, e daûr di cheste tradizion il duche di Cividât si calcolave plui che altri un aleât dal re di Pavie e no un so subordenât. Daûr di chest stes spirt Rotgaut e il so Friûl no podevin acetâ l’imponisi di un regjim centralist e verticist de fate di chel carolin e par difindi la autonomie, scuasi la indipendence, infin dai fats la libertât dal ducât, la vuere e je tornade a tacâ dopo doi agns.
LA SCONFITE_ Tal 776 di fat, dopo che il pape al veve denunziât lis tratativis che Rotgaut al tignive par riclamâ Adalgjîs e par solevâ i duchis che si vevin sometûts a Carli, i francs a mandin un altri esercit cuintri dal Friûl e cheste volte a vincin: il lûc de bataie si piert te liende, daûr di cualchi version dongje di Aquilee, par altris te fuartece di Osôf.
Rotgaut al mûr, salacor ferît in duel propit dal paladin Orlant e po dopo justiziât: il svindic dai francs al çoncje la la resistence langobarde, ma la brame di libertât e di autonomie a restin inlidrisadis par simpri te idee stesse di Friûl.
Sandri Carrozzo
__________________________________
Langobarts: i paris dal Friûl

I Langobarts a jerin un popul gjermanic, bielzà laudât pal lôr valôr di Juli Cesar, cuant che a jerin ancjemò te Gjermanie setentrionâl. Cu lis grandis migrazions di popui che si disglagnin par plui secui e che si sveltissin une vore sul lâ a mont dal imperi roman, intune clime di instabilitât e di crisi, i Langobarts a traviersin in tantis gjenerazions la Europe centrâl e te seconde metât dal secul VI a partissin de Panonie pal lôr ultin viaç: tal 568 a passin lis Alps par concuistâ une Italie fiscade di desenis di agns di vueris e epidemiis.
IL PRIN DUCHE_ Tal moment di tacâ la imprese, di une mont che e domine il paisaç furlan, il re langobart Alboin al decît di fâ duche di chel prin teritori so nevôt Gjisulf: chest al acete dome se al podarà tignî cun se lis miôr fameis langobardis e lis mandriis di cjavai plui fuarts. In cheste maniere e tache la tradizion di chei duchis dal Friûl che a interpretin il ream tant che une confederazion li che lôr a son aleâts dal re e no sudits.
Par doi secui la aministrazion dal podê in Friûl e larà daûr di cheste vision politiche e vuê, cundut che particolaritâts che a individuassin in cualchi maniere il Friûl a jerin ancje prime dal 568, o podìn dî che pardabon i paris dal Friûl a son stâts i Langobarts. (S. Car.)