CJARGNE VIVE. La colonizazion dei impresis e va indenant

Ae fin e je lade cemût che si temeve. Cuntun vôt che nol amet discussions (30 sì, 1 no e 3 astignûts), il Consei di aministrazion des Latariis Furlanis al à dit di sì ae fusion cun Granarolo, preferint il matrimoni cul colòs des cooperativis emilian invezit che il plan industriâl metût a pont, a timp di record ancje se in “zone Cesarini”, dal Consorzi agrari, che pûr al veve cjatât il gradiment de Regjon e des parts sociâls. Il plan dal Consorzi di Basilian al poiave su cuatri pilastris: rimunerazion dal lat ai conferidôrs a presits di marcjât; valorizazion dai implants (intai ultins 3 agns a son stâts invistîts ben 5 milions, in gracie ancje di contribûts regjonâi, visìnsal); riduzion dal soreplui; e gjestion di une “masse critiche” di lat furlan valorizât di prodots dal teritori. A dut chest si à dit di no, assegnant di fat l’asset plui impuartant – la Dop Montâs – a Granarolo.
La vicende des Latariis Furlanis e va in cubie cuntune altre vicende che e cjape dentri dut il Friûl, chê dal plan di delocalizazion di Electrolux, che intai intindiments de multinazionâl svedese al metarès a pericul ancje il futûr dal implant di Purcie. Cuintri i progjets di delocalizazion a son za stadis inviadis taulis di confront e si pense a meti in cjamp un biel pocjis di risorsis publichis par butâ jù i coscj di produzion e evitâ il trasferiment in Polonie. Consecuencis, chestis, des riformis mai metudis in vore di agns e di un coni fiscâl che al fâs aromai cambiâ idee a cui che, dal forest, al volarès invistî intal nestri Paîs. Al è ancje vêr che il Friûl ocidentâl si è intai agns poiât une vore su la presince di Electrolux, tant che cumò il pericul delocalizazion al è ancjemò plui grâf parcè che al va a colpî ducj i setôrs leâts ae subfornidure e ai servizis. La presince de multinazionâl sul teritori e la consecuente “trancuilitât” inte domande, no à sburtât tantis impresis a cirî altris marcjâts, ancje se la cualitât dai prodots realizâts a Pordenon si è man a man dimostrade simpri plui facile di agredî de bande di Paîs a cost dal lavôr plui bas. Tant che ogni multinazionâl, Electrolux no fâs calcui sentimentâi. Ce che al sucedarà cun Granarolo, si viodarà. Ma ciertis liniis a somein za ben claris. Di viodi, invezit, se il progjet dal Consorzi Agrari al rivarà a valorizâ pardabon e in maniere juste risorsis locâls. Nol sarès mâl.
E propri intant che si discuteve dal câs Electrolux, la Confartesanât regjonâl nus à ufiert un altri element di riflession. Intal ultin an, il numar des impresis ativis al è calât di 341 unitâts: a son 979 chês sparidis intal ultin trieni e ben 2.025 chês in mancul, rispiet al pic dal principi dal 2006. Il compart – al à dit il president di Confartesanât Fvj, Graziano Tilatti – al à pierdût tal 2013 cirche 3mil lavoradôrs, «numar plui alt, ma salacor di mancul impat mediatic a pet dai soreplui previodûts in regjon ae Electrolux. Nissune polemiche – al à precisât daurman Tilatti -, ma o volaressin che e vignìs condividude ancje la nestre bataie in difese des piçulis impresis e dal artesanât. Cetantis Electrolux coventino par che cualchidun al tachi a interessâsi dal setôr e dai artesans restâts cence lavôr?» .
Tilatti, inte sô relazion anuâl, al à marcât ancje cemût che il stanziament sul belanç regjonâl 2014 pes dîs liniis di incentîf aes impresis artesanis al sedi pâr a zero, a front di un bisugn – par finanziâ fin a 100 progjets di ricercje – che al rive a 3,5 milions di euros. Intant, il teritori al svent (Latariis Furlanis a Granarolo) o si svent (concessions a Electrolux: ma a front di cualis ciertecis e garanziis? Lu scrîf il stes “Il Sole 24Ore”, di aree confindustriâl: “Intal negoziât complès cun Electrolux al covente no dome subî lis domandis de multinazionâl, ma ancje verificâ che cheste e rilanci, introdusint intes sôs fabrichis talianis mioraments organizatîfs”).
Sarìno bogns di scomençâ a finîle di subî e a crodi intes potenzialitâts – enormis e no esprimudis – dal Friûl? ❚
Linux