IL GRANT LUNARI DAL FRIÛL. Avrîl

Avrîl al è za il cuart mês dal an; il so non al ven dal latin aprilis, che al podarès cjapâ il non o dal grêc Aphrodites o dal verp roman aperire (vierzi), stant che al vierç il cicli stagjonâl ae sô plenece. Prin mês de Vierte, Avrîl al disvee ad in plen la nature e al rinfuartìs la Vierte, mostrant cîi lusints plens di svoi di uciei in amôr. La poiane e svolete alte sore dai cjasâi, la cjavale si strusse cuintri dal sierai; e tache la vite tai sfueis di aghe, tai fossâi e tes palûts, biel che tes aghis corintis i pes a son bielzà in smanie. I boscs a son deventâts fis par vie dai butui e dal fueam tenar e plen di umôr; il cai al jes sui ôrs umits e il cuc al clame cun insistence jenfri i ramaçs alts. Sui cuei lis vîts a son sglonfis e i pomârs a son in flôr e lis clevis, i prâts e lis splanadis verdis a son in plen sflandôr cu la gnove jerbe fofe e lis mil e mil rosis. Dapardut un businâ di âfs e zornâ di uciei, cjantâ di grîs e svoi di paveis, nîts tes cisis e profum di plantis in flôr e la sisile cun grancj svoi in cercli che e dissegne contente il cîl. Cumò dute la nature e je tal sflandôr e, frescje, e profume cun bufs profumâts che a rivin fintremai li de marine, sot dai rais benefics dal soreli. L’astri che al sflamie aromai al cor alt tal firmament turchin jevantsi simpri plui viers il pont di colme dal solstizi di Jugn, puartant cussì zornadis simpri plui lungjis, tant che in Avrîl dopo cene, ancje secont lis tradizions dai proverbis, si pues lâ su la place o fâ tart tai sotpuartis, o fermâsi in curtîl, o restâ tal fogolâr plui a lunc ancje se il stupin dal lum si è aromai distudât za di timp.
Dopo de lungje polse dal Invier, e i prins timits segnâi dal disveâsi, cumò la nature e pant dut il so sflandôr sot dai rais simpri cjalts dal soreli che al tache a colorâ il cîl e lis gnots no fasin plui la zulugne ma la rosade. Avrîl al jere il mês de rogazion maiôr, che si tignive ai 25, dì li che lungjis processions a traversavin i trois des culinis e dal plan par benedî la campagne a pene sveâde di gnûf dal lunc sium invernâl e pronte par ricevi la vore dal om. Lis preieris, i sconzûrs, lis litaniis e i cjants ritmâts des rogazions a jemplavin vals e planuris, intant che tai paîs di dulà che a partivin e dulà che lis procession a tornavin dopo i luncs percors vie pe campagne a sunavin a fieste lis cjampanis. Ai 25 di Avrîl al jere un grant dì, une fieste globâl pal Friûl, par vie che in chel si memoreave ancje S.Marc, l’evangjelist di dulà che, lant daûr de tradizion, e vignive la gloriose glesie di Aquilee e po, dopo la fin de Seconde Vuere Mondiâl al deventà ancje zornade di ricuart de Liberazion des trupis nazifassistis. ❚
✒ Mario Martinis