IL GRANT LUNARI DAL FRIÛL. Març

Març al è il tierç mês dal an e l’ultin dal Invier; il so non al à origjin dal mês roman Martius, che lu à cjapât di Mars, la divinitât che e fecondave la nature, e metût tal periodi li che e tache a disveâsi la fuarce rigjenerante de vite. Març, cussì, al ven a rapresentâ il moviment, il cambiament, la vitalitât e la energjie de vite gnove che e sbrunte di sot des çopis, stiçade dal cjalt dal soreli che si è jevât di cetant sul cîl di setentrion. Març al fâs mudâ la atmosfere e sbrissâ planc a planc dal Invier ae Vierte cul so aspiet balarin, fat di soreli cjalt tal cîl lusint, nûi morbits e fofs, aiar di burascje e svintadis di tramontane, ploie fite e sutîl, sborfadis di nêf. Març al è il grant mês di passaç aes atmosferis de Vierte (Març al mene la code pal bearç). Ducj i ramaçs a son cjamâts di butui, e florìs la zale forsithya tai zardins e une sdrume di rosis e pant i siei colôrs sui prâts che a tachin a sverdeâ, biel che ducj i cors di aghe a fasin sintî il lôr cjacareç, aromai diliberâts de glace. Cussì la Vierte e rive cidine, dolce, clipe, puartant la emozion di viodi tai cîi lusints i prins svoi de sisile che come ogni an e torne al so nît. I uciei a scomencin i lôr nîts tes cjarandis e sui arbui cu lis primis fueutis pene saltadis fûr, intant che sui prâts puntinâts di rosutis al cor il jeur e tai puescj plui insoreglâts i animâi salvadis si stan disveant dal lunc letarc. Cumò dut il ream animâl al è in ferment e si pronte al grant destin dai amôrs e de riproduzion.
Lis zornadis si son slungjadis un grum e tor dai 21 di Març il soreli al zire aromai alt tocjant l’ecuinozi, moment li che il dì al è lunc come la gnot, cjatansi il grant disc di fûc jenfri il solstizi di Invier (pont dal soreli plui bas) e chel di Istât (pont dal soreli plui alt). Propri culì e nas la Vierte e la lûs si slargje ancjemò simpri di plui, scurtant in proporzion lis gnots, puartant climis dolçs e cambiant i paisaçs de nature. Cumò la lûs e trionfe pardabon sul scûr. Stant ai dificii calcui eclesiastics la Pasche e pues colâ in Març (Pasche basse) o in Avrîl (Pasche alte) di ogni an e a voltis, ancje cuant che e cole in Març, la nature e je in flôr (Pasche sfluride), la temperadure e je clipe e ducj i paisaçs a son dolçs, cjariant ancjemò di plui atmosfere la grande fieste cristiane. La date di fonde di passaç ae Vierte une volte e jemplave di gjonde e di sperance soredut chei che a vivevin des voris dai cjamps, che a chel pont dal calendari a jerin pronts par jessi lavorâts de man savinte dal om. ❚
✒ Mario Martinis