LA CUISTION DES PROVINCIIS. Vie lis provinciis: il consei regjonâl al à deliberât

Ai 31 di Zenâr il consei regjonâl al à votât la leç che e inviarà il percors parlamentâr pe scancelazion de provinciis: 23 vôts a pro (la maiorance: Pd, SEL, e Cittadini) e 14 cuintri (Pdl, Autonomia Responsabile, Marini di GM/FI e Barillari di GM/UDC, Movimento 5 stelle); prime de votazion, par protestâ cuintr de norme in aprovazion, il Grup de Lega Nord e Elio De Anna di GM/FI a àn lassade la aule. In non di un sparagn dut di dimostrâ e cence nissun oblic di leç statâl parcè che inte nestre Regjon la autonomie speciâl e varès permetût di decidi in autonomie stant la competence primarie in teme di ents locâi, il Centriçampe al à decidût che l’ent di mieç al vignarà eliminât e cun lui il Friûl. Ancje se cumò a varan di fâ un dopli passaç sedi ae Cjamare sedi al Senât e duncje l’iter pe modifiche di une norme costituzionâl nol è cussì sempliç e curt, intant il segnâl al è stât dât: cuâl? Che la mode taliane di “sacrificâ” lis provinciis tal non dal principi “o vin fat alc”, e je passade ancje chi di nô, ancje se la Cort dai Conts e à dit che il Ddl Delrio (la propueste parlamentâr che e previodarès la scancelazion definitive des provinciis) nol à sens par vie che no son dimostrâts ni i sparagns ni la concretece de eventuâl ridistribuzion des competencis. Anzit, al è in pericul sedi l’asset istituzionâl, i coscj e i servizis che a riscjin di no jessi garantîts ai citadins.
O restìn de opinion, dal pont di viste tecnic, che la riorganizazion dai ents no pues passâ pe eliminazion dal ent di mieç, anzit: gjavâlu al varès ancje l’efiet colaterâl di gjavâ une rapresentance concrete istituzionâl al Friûl, che cence des provinciis, nol varès nissun rapresentant a difindilu cuintri dal centralisim triestin e roman.
E su chest pont o invidìn i presidents de Provincie di Gurize, di Pordenon e di Udin a cirî di fâ front comun: la difese de provincie no pues limitâsi a someâ la difese di une poltrone, ma e à di jessi puartade indevant, come che al sosten il President Fontanini, tal interès dal Friûl unît. ❚
Redazion